BAKI,VOA, Fərid Mikayılov
Səudiyyə Ərəbistanının vəliəhdi Məhəmməd bin Salman İtaliyanın Baş naziri Giorgia Meloni ilə Ciddə şəhərində görüş keçirib.
VOA xəbər verir ki, görüş zamanı tərəflər ikitərəfli münasibətləri müzakirə edib, əməkdaşlığın daha da genişləndirilməsi imkanlarını dəyərləndiriblər.
Bununla yanaşı, regional vəziyyət, xüsusilə davam edən hərbi gərginliyin qlobal ticarətə, enerji təhlükəsizliyinə və dünya iqtisadiyyatına təsiri müzakirə olunub. Tərəflər Yaxın Şərqdə sabitliyin qorunması üçün koordinasiyanın vacibliyini vurğulayıblar.
Məlumata görə, Meloninin səfəri ABŞ və İsrailin İrana qarşı hərbi əməliyyatlara başlamasından sonra Avropa İttifaqı liderləri arasında regiona edilən ilk səfərdir.
İtaliya Baş naziri dövlət televiziyasına müsahibəsində ölkəsinin Körfəz dövlətləri ilə həmrəylik nümayiş etdirdiyini bildirərək onları “strateji tərəfdaşlar” adlandırıb. O, səfərin həm də enerji məsələlərinə yönəldiyini qeyd edib.
Meloni bildirib ki, Körfəz ölkələri İtaliyanın enerji tələbatının təxminən 15 faizini təmin edir və sabit enerji təchizatının qorunması böyük əhəmiyyət daşıyır.
