ABŞ Prezidenti Donald Tramp çərşənbə günü verdiyi açıqlamada, sübh saatlarında İranla elan olunan atəşkəs razılaşmasının Livanı əhatə etmədiyini bildirib.
VOA xəbər verir ki, Tramp Amerikanın "PBS" şəbəkəsinə müsahibəsində Livanın "Hizbullah" faktoruna görə sövdələşmədən kənarda qaldığını qeyd edib. Prezidentin sözlərinə görə, İsrailin son hücumları "ayrıca bir döyüşdür" və bunu hər kəs bilir.
Ağ Evin sözçüsü Karolayn Livitt də "Axios" xəbər saytına təsdiqləyib ki, Livan Vaşinqton və Tehran arasındakı razılaşmanın bir hissəsi deyil. Lakin bundan əvvəl "Associated Press" agentliyi danışıqlarda iştirak edən rəsmiyə istinadən Livanın da atəşkəsə daxil olduğunu xəbər vermişdi.
Livanda "qanlı çərşənbə": 87 ölü, 700 yaralı
ABŞ və İran arasında iki həftəlik atəşkəs elan olunduqdan bir neçə saat sonra İsrail ordusu Livana qarşı martın 2-dən bəri ən böyük hava hücumunu həyata keçirib. Livan Səhiyyə Nazirliyinin "Əl-Cəzirə"yə verdiyi ilkin məlumata görə, hücum nəticəsində 87 nəfər həlak olub, 700-dən çox insan yaralanıb.
Tramp və Netanyahu arasında gizli razılaşma?
"Axios"un məlumatına görə, İsrailin Baş naziri Benyamin Netanyahu atəşkəs elanından dərhal əvvəl Tramp ilə telefon danışığında Livan məsələsini qaldırıb. Mənbələr iddia edir ki, hər iki lider Livan cəbhəsində döyüşlərin davam etdirilməsi barədə razılığa gəliblər. Ağ Ev isə Livanın İranla olan atəşkəsi pozacağından narahat deyil.
İsrail cəbhələri ayırmağa çalışır
İsrailin müdafiə naziri İsrail Katz bildirib ki, Təl-Əviv İranla olan müharibəni Livan cəbhəsindən ayırmaqda israrlıdır. O, bunu "Livanın reallığını dəyişmək və İsrailin şimalına olan təhdidləri aradan qaldırmaq" məqsədilə etdiklərini iddia edib.
İranın "atəşkəsdən çəkilmə" hədəsi
"Wall Street Journal"ın məlumatına görə, Tehran regional vasitəçilərə xəbərdarlıq edib ki, əgər Livanda atəşkəs bərqərar olmazsa, İran İslamabaddakı danışıqlardan geri çəkilə bilər. İran tərəfi həmçinin Hörmüz boğazını yenidən bağlayacağı və İsrail də daxil olmaqla region ölkələrinə zərbələr endirəcəyi ilə hədələyib.
İranın "Press TV" kanalı yüksək rütbəli təhlükəsizlik rəsmisinə istinadən xəbər verib ki, İsrailin bu kövrək atəşkəsi pozması fonunda İran hər an "hərtərəfli müdafiə hücumuna" başlaya bilər. "Təsnim" agentliyi isə İran Silahlı Qüvvələrinin artıq cavab zərbələri üçün hədəfləri müəyyənləşdirdiyini bildirib.
Pakistan: "Pozuntular sülh prosesini sarsıdır"
Vasitəçi rolunu oynayan Pakistanın Baş naziri Şahbaz Şərif xəbərdarlıq edib ki, bəzi bölgələrdəki atəşkəs pozuntuları sülh ruhuna ziddir. O, razılaşmanın "Livan da daxil olmaqla hər yeri" əhatə etdiyini israrla xatırladaraq, tərəfləri təmkinli olmağa çağırıb.
Qeyd edək ki, İsrail ordusu cəmi 10 dəqiqə ərzində Livanın 100-dən çox nöqtəsini hədəf aldığını rəsmən bəyan edib.
