BAKI,VOA, Nailə Babazadə
İsrailin müdafiə naziri İsrail Katz ABŞ ilə aparılan danışıqlarda razılıq əldə olunmayacağı təqdirdə İrana qarşı daha şiddətli zərbələr endirəcəkləri ilə hədələyib.
VOA xəbər verir ki, İsrail Müdafiə Nazirliyindən verilən yazılı məlumata görə, nazir Katz iştirak etdiyi mərasimdə çıxışı zamanı ABŞ ilə 8 aprel tarixində əldə olunmuş müvəqqəti atəşkəsə qədər 40 gün boyunca hücum etdikləri İranın hazırda "tarixi bir yol ayrımında" olduğunu iddia edib.
Katz ABŞ ilə davam edən müzakirələrdə razılaşma əldə edilməzsə, "İranda hələ hədəf alınmayan nöqtələrə qarşı hücumların əvvəlki hədəflərlə müqayisədə çox daha ağrılı olacağını" bildirib. Seçimin Tehran rəhbərliyinin əlində olduğunu irəli sürən nazir "İranın bütün strateji hədəflərini və imkanlarını məhv etdik, ehtiyac yaranarsa, bunu yenidən edəcəyik" deyə vurğulayıb.
