BAKI,VOA, Orxan Qədirzadə

Livan hökuməti İsrail qüvvələrinin tam geri çəkilməsi olmadan hər hansı razılaşmanı qəbul etməyəcəyini bəyan edib.

VOA xəbər verir ki, Livanın baş naziri Nəvvaf Salam verdiyi açıqlamada ölkəsinin mövqeyinin dəyişməz olduğunu vurğulayıb.

O bildirib ki, İsrailin Livan ərazisindən tam çıxması istənilən razılaşmanın əsas şərtidir və bu tələb yerinə yetirilmədən sənəd imzalanmayacaq.

Baş nazir həmçinin ABŞ administrasiyasını İsrailə təzyiq göstərməyə çağıraraq, hərbi əməliyyatların dayandırılmasının vacibliyini qeyd edib.

Onun sözlərinə görə, Livan ərazisində “bufer zona” yaradılması qəbuledilməzdir, çünki bu, məcburi köçkünlərin öz evlərinə qayıdışını məhdudlaşdırır.

Nəvvaf Salam vurğulayıb ki, ölkədə silahın yalnız dövlətin nəzarətində olması milli maraqlara uyğundur və paralel silahlı strukturların mövcudluğu qəbuledilməzdir.

O qeyd edib ki, silahsızlaşdırma prosesi mərhələli şəkildə həyata keçiriləcək və bu istiqamətdə artıq müəyyən addımlar atılıb.

Baş nazir beynəlxalq tərəfdaşlara müraciət edərək Livan ordusunun gücləndirilməsi üçün maliyyə və texniki dəstəyə ehtiyac olduğunu bildirib.

Eyni zamanda, o, ölkədə humanitar vəziyyətin ağır olduğunu vurğulayaraq, yenidənqurma işləri üçün əlavə maliyyə resurslarının ayrılmasını istəyib.