BAKI,VOA,Yusif Şərifzadə
İsrail ordusu Livan sərhədi yaxınlığında, ölkənin şimalında “Hizbullah”a məxsus pilotsuz uçuş aparatının partlaması nəticəsində üç israilli hərbçinin yaralandığını açıqlayıb.
VOA xəbər verir ki, hücum zamanı yaralanan hərbçilərdən birinin vəziyyətinin ağır olduğu bildirilib. Bu barədə “Haaretz” nəşri məlumat yayıb.
İsrail ordusunun yaydığı açıqlamada qeyd olunub ki, şənbə günü partlayıcı maddələrlə təchiz edilmiş bir neçə pilotsuz uçuş aparatı İsrail ərazisinə daxil olub və onlardan bəziləri ölkə daxilində müxtəlif ərazilərə düşüb.
Açıqlamada, həmçinin Livanın cənubunda yerləşən İsrail hərbi qüvvələrinə doğru atılan bir neçə mərminin hava hücumundan müdafiə sistemləri tərəfindən zərərsizləşdirildiyi bildirilib.
Hadisə fonunda İsrail-Livan sərhədində gərginliyin davam etdiyi qeyd olunur.
