BAKI,VOA Orxan Qədirzadə

İsrailin Baş naziri Benyamin Netanyahu ABŞ-ın İsrailə göstərdiyi hərbi və maliyyə yardımının mərhələli şəkildə dayandırılmasının vaxtının çatdığını bildirib.

VOA xəbər verir ki, Netanyahu ABŞ-ın CBS televiziya kanalında yayımlanan “60 Minutes” proqramına müsahibəsində İsrail iqtisadiyyatının gücləndiyini və artıq yardım modelindən strateji tərəfdaşlıq modelinə keçmək istədiklərini bəyan edib.

Netanyahu qeyd edib ki, İsrail son illərdə yüksək texnologiyalar və müdafiə sənayesi sahəsində böyük inkişaf əldə edib. O bildirib ki, illik 3,8 milyard dollarlıq ABŞ hərbi yardımının gələcəkdə “sıfıra endirilməsi” üçün razılaşdırılmış proqram hazırlanmalıdır.

İsrail Baş naziri İranın hazırda “ən zəif dövrünü” yaşadığını iddia edərək, ABŞ və İsrailin birgə əməliyyatları nəticəsində Tehranın hərbi və iqtisadi infrastrukturuna ciddi zərbələr vurulduğunu deyib. Netanyahu xüsusilə Hörmüz boğazı ətrafında tətbiq edilən təzyiq mexanizmlərinin davam etdiyini vurğulayıb.

Çinin İranın raket proqramına dəstəyi ilə bağlı suala cavab verən Netanyahu Pekinin müəyyən texniki komponentlər təmin etdiyini bildirib və bunun onu narahat etdiyini qeyd edib.

Netanyahu həmçinin Hizbullaha qarşı əməliyyatların davam etdiriləcəyini açıqlayıb. Onun sözlərinə görə, təşkilatın müharibədən əvvəl malik olduğu raket arsenalının böyük hissəsi məhv edilib.

ABŞ ictimaiyyətində İsrailə dəstəyin azalması ilə bağlı fikirlərə münasibət bildirən Netanyahu bəzi xarici qüvvələrin sosial şəbəkələr vasitəsilə ABŞ-İsrail münasibətlərinə qarşı informasiya manipulyasiyası həyata keçirdiyini iddia edib.

Analitiklər Netanyahu administrasiyasının bu açıqlamalarını Vaşinqton-Təl-Əviv münasibətlərində yeni siyasi və iqtisadi mərhələnin başlanğıcı kimi qiymətləndirirlər. Ekspertlərə görə, İsrailin yardım modelindən strateji texnologiya və müdafiə tərəfdaşlığı modelinə keçmək istəyi regiondakı geosiyasi balanslara da təsir göstərə bilər.