BAKI,VOA Yusif Şərifzadə

BBC tərəfindən yayımdan çıxarılan “Qəzza: Hücum Altında Həkimlər” sənədli filmi televiziya üzrə “Bafta” mükafatlarının “aktual hadisələr” kateqoriyasında qalib olub.

VOA xəbər verir ki, filmin yaradıcıları mükafatlandırma mərasimində BBC-ni sərt şəkildə tənqid ediblər.

Qəzzadakı fələstinli səhiyyə işçilərinin birbaşa şahid ifadələrini əks etdirən sənədli film BBC tərəfindən “qərəzsizliklə bağlı narahatlıqlar” səbəbindən yayımdan çıxarılsa da, daha sonra “Channel 4” telekanalında nümayiş etdirilib.

Mükafatlandırma mərasimində çıxış edən icraçı prodüser Ben de Pir filmin hazırlanmasında iştirak edən jurnalistlərə təşəkkür edib və BBC-nin qərarını yenidən gündəmə gətirib.

O, “Bafta” mərasimini gecikmə ilə yayımlayan BBC-yə müraciətlə diqqətçəkən sual ünvanlayıb.

“Sonda BBC-yə sadəcə bir sualım var: Filmimizi yayımdan çıxardığınıza görə, bu gecə keçiriləcək ‘Bafta’ yayımından da bizi çıxaracaqsınız?” – deyə Ben de Pir bildirib.

Sənədli filmin mükafat qazanması BBC-nin qərarı ilə bağlı beynəlxalq media dairələrində müzakirələri yenidən gücləndirib.