BAKI,VOA Orxan Qədirzadə

Səudiyyə Ərəbistanı Kralı, Salman bin Əbdüləziz Əl Səud müqəddəs məkanlara xidmət etməyin və Allahın evini ziyarət edən zəvvarlara qayğı göstərməyin onlar üçün böyük şərəf olduğunu bildirib.

VOA xəbər verir ki, Səudiyyə Ərəbistanının kralı Qurban bayramı münasibətilə yayımladığı müraciətdə bildirib ki, “Uca Allahın bizi İki Müqəddəs Məscidə xidmət və Allahın evinin zəvvarlarına qayğı ilə şərəfləndirməsinə görə Ona şükür edirik”.

Kral Salman Allahdan zəvvarların həcc ibadətlərini, qurbanlarını və dualarını qəbul etməsini diləyib.

O, həmçinin Qurban bayramı münasibətilə Səudiyyə Ərəbistanı xalqını və bütün İslam aləmini təbrik edərək bildirib ki, bu bayramın dünya üçün xeyir, sülh və sabitlik bayramına çevrilməsini arzulayır.

Bu arada, bu gün səhər saatlarından etibarən milyonlarla zəvvar Minada şeytana daşatma mərasiminə başlayıb. Zəvvarlar əvvəlcə Böyük Cəmrəyə yeddi daş ataraq həcc mərasimlərinin əsas hissələrindən birini yerinə yetiriblər. Hərəkətin rahat təşkili üçün əvvəlcədən hazırlanmış nəqliyyat və yönləndirmə planı tətbiq olunub.

Məlumata görə, dünən gün batımından sonra təxminən 1,7 milyon zəvvar Ərəfatdan Müzdəlifəyə hərəkət edib. Ağ ehram geyimində olan zəvvarlar həccin əsas mərhələsini təhlükəsiz şəkildə tamamlayaraq gecəni Müzdəlifədə keçiriblər.

Səudiyyə Ərəbistanının təhlükəsizlik və xidmət qüvvələri zəvvarların Ərəfatdan Müzdəlifəyə, daha sonra isə Minaya hərəkətini təmin etmək üçün bütün müqəddəs məkanlarda geniş şəkildə yerləşdirilib. Zəvvarlar Mina bölgəsində Böyük Cəmrəyə daş atdıqdan sonra Kəbəni təvaf edir, qurban kəsir, saçlarını qırxdırır və ya qısaldırlar. Bundan sonra onlar həcc mərasimlərinin qalan günlərini Mina bölgəsində davam etdirirlər.

Səudiyyə Ərəbistanının daxili işlər naziri, Əbdüləziz bin Səud bin Nayif bildirib ki, həcc mövsümündə təhlükəsizlik, təşkilati və xidmət sistemləri arasında yaradılmış koordinasiya zəvvarlara göstərilən diqqətin yüksək səviyyəsini nümayiş etdirir. Nazir vurğulayıb ki, müasir texniki imkanlar və təhlükəsizlik planları zəvvarların təhlükəsizliyini və ibadətlərini rahat şəkildə yerinə yetirməsini təmin edir.

Daxili işlər naziri dünən həcc təhlükəsizlik qüvvələrinin tərkibində fəaliyyət göstərən xüsusi təhlükəsizlik bölmələrinə baxış keçirib və onların gördüyü işləri yüksək qiymətləndirib.