BAKI,VOA Orxan Qədirzadə
Fələstinli gənc tələbə Leyali əl-Xətib astronavt proqramına qəbul üçün tələb olunan mərhələləri uğurla keçərək Fələstin tarixində ilk qadın astronavt namizədi kimi diqqət mərkəzinə düşüb.
Cəmi 18 yaşı olan Leyali əl-Xətib hazırda Fələstin Politexnik Universitetinin mühəndislik fakültəsində təhsil alır. O bildirib ki, kosmosla bağlı arzusu uşaqlıq illərindən başlayıb və illər keçdikcə daha da güclənib.
Gənc tədqiqatçının sözlərinə görə, məqsədi sadəcə elm öyrənmək deyil, həm də elmin inkişafına töhfə vermək olub. O, uşaqlıqdan kainatın sirlərini araşdıran insanlar sırasında yer almağı xəyal etdiyini deyib.
Astronomiya və astrofizikaya olan maraq zamanla ciddi elmi fəaliyyətə çevrilib. Leyali kosmosda cazibə qüvvəsinin xüsusiyyətləri və onun müxtəlif planetlərdə yaratdığı təsirlərlə bağlı araşdırmalar aparıb. Bundan əlavə, o, kosmik robot texnologiyaları sahəsində də elmi layihələr hazırlayıb.
Elmi fəaliyyəti sayəsində Leyali bir sıra beynəlxalq konfrans və müsabiqələrdə iştirak etmək imkanı qazanıb. O, müxtəlif layihələrini Amerika Birləşmiş Ştatları və Almaniya kimi ölkələrdə keçirilən beynəlxalq tədbirlərdə təqdim edib.
Kosmosa aparan yolun asan olmadığını bildirən gənc namizəd qəbul prosesinin bir neçə mürəkkəb mərhələdən ibarət olduğunu vurğulayıb. Onun sözlərinə görə, ilk olaraq ilkin müraciət təsdiqlənib, daha sonra isə psixoloji, intellektual və tibbi yoxlamalardan keçib.
Bununla yanaşı, proqram çərçivəsində təcrübəli astronavtlarla fərdi müsahibələr təşkil olunub. Leyali bütün mərhələlərdə yüksək nəticələr göstərərək yekun seçim siyahısına daxil olmağa nail olub.
O bildirib ki, bu uğurun əldə olunmasında ailəsinin, müəllimlərinin və universitet rəhbərliyinin dəstəyi mühüm rol oynayıb. Xüsusilə atasının ona göstərdiyi mənəvi dəstəyin qarşılaşdığı çətinlikləri aşmasına kömək etdiyini qeyd edib.
Leyali əl-Xətib bu nailiyyəti yalnız şəxsi uğur kimi deyil, həm də Fələstin üçün mühüm hadisə kimi qiymətləndirir. Onun fikrincə, bu seçim Fələstinin kosmik elmlərlə maraqlanan ölkələr sırasında yer aldığını bir daha nümayiş etdirir.
Gənc astronavt namizədi çıxışının sonunda fələstinli və ərəb gənclərə müraciət edərək astronomiya və kosmik tədqiqatlar sahəsində fəaliyyət göstərmək istəyən tələbələrə ilham vermək istədiyini bildirib.
Dünya üzrə ən gənc astronavt namizədlərindən biri hesab edilən Leyali əl-Xətib gələcəkdə özündən sonra daha çox fələstinli və ərəb gəncin kosmos elmlərinə yönələcəyinə ümid etdiyini vurğulayaraq, “Ümid edirəm ki, sonuncu olmayacağam” sözləri ilə gənclərə çağırış edib.
