BAKI,VOA,Yusif Şərifzadə

İraq hökuməti ABŞ ilə İran arasında atəşkəs əldə olunmasına vasitəçilik etdiyi barədə yayılan məlumatları rədd edib. Rəsmi Bağdad bu iddiaların həqiqəti əks etdirmədiyini bildirib.

VOA xəbər verir ki, İraqın Baş nazir Aparatı ABŞ-nin "The New York Times" qəzetində dərc olunan məlumatı "tamamilə əsassız" adlandırıb. İraq Xəbər Agentliyinin yaydığı bəyanatda qeyd olunub ki, həmin iddiaların reallıqla heç bir əlaqəsi yoxdur.

Baş nazir Aparatı kütləvi informasiya vasitələrini məlumatları yaymazdan əvvəl rəsmi mənbələrə istinad etməyə, anonim mənbələrə əsaslanan təsdiqlənməmiş xəbərləri dövriyyəyə buraxmamağa çağırıb.

"The New York Times" İran və İraq rəsmilərinə istinadən yazmışdı ki, İraqın Baş naziri Əli əz-Zaidi bu ayın əvvəlində ABŞ Prezidenti Donald Trampla Ağ evdə keçirdiyi görüşdən sonra Tehrana səfəri zamanı Vaşinqtonun atəşkəs təklifini İran tərəfinə çatdırıb.

Məlumata görə, İran rəsmiləri həmin təklifi müzakirə olunan yeganə variant kimi qiymətləndirsələr də, sonradan onu qəbul etməyiblər.

Qəzetin iddiasına əsasən, Tehran təklifi Hörmüz boğazına nəzarət məsələsini əhatə etmədiyi üçün rədd edib. İran tərəfi isə bu məlumatla bağlı rəsmi açıqlama verməyib.