BAKI,VOA,Yusif Şərifzadə
Livan Ali İslam Şiə Şurası sədrinin müavini və Hizbullaha yaxınlığı ilə tanınan Şeyx Əli əl-Xətib Livanın ABŞ və İsrailin təminatlarına inanmadığını, etimadını isə İran və müqavimət qüvvələrinə göstərdiyini bildirib.
VOA xəbər verir ki, İranın Tasnim xəbər agentliyinin yaydığı məlumata görə, Şeyx Əli əl-Xətib Livan xalqının keçmişdə yaşadığı "acı təcrübələrin" verilən vədlərə etibar etməməyə əsas yaratdığını deyib.
O bildirib ki, Livan xalqı səbir və müqavimət qüvvələrinə güvənir və bu qüvvələr "boş vədlər və andlar qarşılığında silahlarını təhvil verməyəcəklər".
Əl-Xətib əlavə edib ki, Livan üçün əsas dayaq müttəfiqləri, qardaşları və dostlarıdır.
Onun sözlərinə görə, bu müttəfiqlər arasında ilk sırada İran İslam Respublikası dayanır və Tehran indiyədək Livana dəstəyini əsirgəməyib, verdiyi öhdəlikləri yerinə yetirib.
Şeyx Əli əl-Xətibin bu açıqlamaları Hizbullaha yaxın mövqeni əks etdirir və Livan hökumətinin rəsmi siyasəti kimi təqdim olunmur.
ABŞ, İsrail və İran tərəfi bu bəyanatla bağlı hələlik rəsmi münasibət açıqlamayıb.
