BAKI,VOA,Yusif Şərifzadə

İşğal altındakı İordan çayının qərb sahilinin bir sıra bölgələrində İsrail ordusunun əməliyyatları və məskunlaşmaçıların fəaliyyəti davam edir.

VOA xəbər verir ki, Qalandiya qaçqın düşərgəsində İsrail ordusunun genişmiqyaslı əməliyyatı ikinci gündür davam edir.

Məlumata görə, reydlər zamanı azı 16 nəfər yaralanıb, təxminən 60 fələstinli saxlanılıb. Ərazidə mağazaların dağıdıldığı, əsas yolların bağlandığı, nəqliyyat vasitələrinin yoxlanıldığı və komendant saatının tətbiq edildiyi bildirilir.

Qalqiliya şəhərində, eləcə də onun cənubunda yerləşən Əzzun Atma və Beyt Amin kəndlərində İsrail qüvvələrinin yaşayış evlərinə reydlər keçirdiyi qeyd olunub.

Fələstinin WAFA agentliyinin məlumatına görə, Şimali İordan vadisində yerləşən Hammamat əl-Malih bölgəsində İsrail məskunlaşmaçıları ikinci gündür əraziləri hasarlayaraq fələstinlilərin torpaqlarına girişinə mane olurlar.

Bununla yanaşı, İsrail ordusunun Nablusun şərqində yerləşən Əskər qaçqın düşərgəsində də əməliyyat keçirdiyi bildirilir.

Bölgədə təhlükəsizlik vəziyyətinin gərgin olaraq qaldığı və əməliyyatların davam etdiyi qeyd edilir.