BAKI,VOA Orxan Qədirzadə
Tripoli şəhərində fəaliyyət göstərən Birləşmiş Millətlər Təşkilatının Liviyaya Dəstək Missiyası ölkədə miqrantların daimi yerləşdirilməsinə dair yayılan məlumatların həqiqəti əks etdirmədiyini bəyan edib.
Açıqlama Liviyada miqrantların yerləşdirilməsinə qarşı çıxan bir qrup etirazçının missiyanın Tripolidəki mərkəzinə daxil olmasından və BMT-nin Qaçqınlar üzrə Ali Komissarlığının ofisini torpaq sədlərlə mühasirəyə almasından sonra verilib.
Missiya bildirib ki, Liviyanın vətəndaşları düzgün və etibarlı məlumat almaq, həmçinin fikirlərini dinc şəkildə ifadə etmək hüququna malikdirlər. Bununla yanaşı, BMT-nin Liviyadakı fəaliyyəti barədə yanlış və çaşdırıcı məlumatların yayılması, eləcə də nifrət çağırışlarının artması ciddi narahatlıq doğurur.
Qurumun açıqlamasında vurğulanıb ki, əsassız iddialar həm yerli, həm də beynəlxalq BMT əməkdaşlarına qarşı gərginliyi artırır və təxribatlara şərait yaradır.
Son günlər sosial şəbəkələrdə BMT qurumlarının qeyri-qanuni miqrantların Liviyada daimi məskunlaşdırılmasını planlaşdırdığı barədə paylaşımlar yayıldığı qeyd olunub. Missiya bu məlumatları qəti şəkildə rədd edərək bildirib ki, BMT sisteminə daxil olan heç bir qurum, o cümlədən Qaçqınlar üzrə Ali Komissarlıq Liviyada miqrantların yerləşdirilməsi ilə bağlı hər hansı proqram həyata keçirmir. Açıqlamada əksini iddia edən bütün məlumatların tamamilə əsassız olduğu vurğulanıb.
BMT-nin Qaçqınlar üzrə Ali Komissarlığının Liviya hakimiyyəti və beynəlxalq tərəfdaşlarla əməkdaşlıq çərçivəsində ölkənin suverenliyinə hörmət göstərərək müharibə, silahlı münaqişə və təqiblərdən qaçan insanlar üçün Liviyadan kənarda həll yolları axtardığı bildirilib.
Bu istiqamətdə üçüncü ölkələrə təxliyə proqramları, həmçinin müvafiq şərait yarandığı halda könüllü geri dönüş proqramları həyata keçirilir.
Missiya BMT əməkdaşlarına qarşı təhdidləri, zorakılığa çağırışları və təşkilatın binaları ilə əmlakına yönəlmiş hücumları pisləyib. Bütün tərəflər beynəlxalq hüquq normalarına uyğun olaraq BMT obyektlərinin toxunulmazlığına hörmət etməyə çağırılıb.
Xatırladılıb ki, Liviyanın Milli Birlik Hökumətinin Daxili Təhlükəsizlik İdarəsi 2025-ci il aprelin 2-də 10 beynəlxalq humanitar təşkilatın fəaliyyətini dayandırıb. Həmin təşkilatlar ölkənin maraqlarına zidd fəaliyyət göstərməkdə, o cümlədən qeyri-qanuni miqrantların yerləşdirilməsi ilə bağlı işlər aparmaqda ittiham olunublar.
Milli Birlik Hökumətinin daxili işlər naziri İmad Trabulsi isə 2025-ci il dekabrın 2-də bildirib ki, Avropaya keçid məqsədilə Liviyada olan qeyri-qanuni miqrantların sayı təxminən 3 milyona çatır.
Ölkənin Xarici İşlər Nazirliyi iyunun 1-də yaydığı açıqlamada qanunsuz miqrasiya ilə mübarizədə Liviyanın əsas prinsiplərinə sadiq qaldığını və miqrantların ölkə ərazisində yerləşdirilməsinə qarşı mövqeyini bir daha təsdiqləyib.
Liviya Milli Ordusunun baş komandanının müavini general-leytenant Səddam Haftar isə iyunun 2-də təhlükəsizlik qüvvələrinə ölkənin şərq və cənub bölgələrində qeyri-qanuni miqrantların qanunsuz mövcudluğuna son qoyulması ilə bağlı göstəriş verib.
Məlumata görə, Aralıq dənizinə çıxışı olan Liviyanın şimal-qərb bölgələrində, xüsusilə Qarabulli, Sabrata və Zuvara şəhərlərində siyasi parçalanma və təhlükəsizlik boşluğundan istifadə edən qruplaşmalar qeyri-qanuni miqrantların qanunsuz daşınması ilə məşğul olurlar.
