Bakı, AzerVoice:

Azərbaycan üçün hər zaman önəmli olan Azərabycan xalqının mövqeyi, maraqları olub. Bugün də Azərbaycan dövlətinin bu siyasəti dəyişilməz qalıb. Azərbaycan üçün önəmli olan AŞPA-nın mövqeyi deyil, milli maraqlardır.

Bu sözləri AzerVoice-a açıqlamasında təhlükəsizlik orqanlarının veteranı, fəxri əməkdaşı, polkovnik Azər Qarayev deyib.

A.Qarayev bildirib ki, Azərbaycan nümayəndə heyətinin etimadnaməsini ratifikasiya etməkdən imtina təklifi Avropa Şurasının etibarına ciddi zərbə vurmuş oldu.

"Azərbaycan müstəqil dövlət kimi dünyada nüfuz sahibinə çevrilib. Artıq hər kəs anlayır ki, Azərbaycan etibarlı tərəfdaşdır və onun mövqeyinə təzyiqlə təsir etmək mümkün deyil. Əslində AŞPA kimi alət olan təşkilatların da ölkəmizə qarşı qərəzinin təməlində bu faktor dayanır. Azərabycan müstəqil mövqeyinə təsir etməyə çalışan bir sıra qüvvələr nəticə əldə edə bilmədikcə daha da azğınlaşır, öz mahiyyətlərini ifşa edirlər", - deyə A.Qarayev əlavə edib.

A.Qarayev bildirib ki, Azərbaycanın AŞPA-ya üzv olduğu 2001-ci ildən etibarən özünü etibarlı tərəfdaş kimi təsdiqləyib.

"Əvəzində isə AŞPA-nın qərəzli, ədalətsiz yanaşmasının şahidi olmuşuq. Azərbaycan digər beynəlxalq təşkilatların olduğu kimi bu qurumun da hər zaman fəaliyyətinə öz töhfəsini verməyə çalışıb. Əvəzində isə Qərbdəki anti-Azərbaycan qüvvələr bu qurumdan Azərbaycana təzyiq etmək, ölkəmizin imicini zədələmək məqsədilə istifadə etməyə çalışıblar, bu qurumlar vasitəsilə Azərbaycanla diktə dilində danışmaq, öz qərarlarını qəbul etdirmək məqsədi güdüblər.

Lakin Azərbaycan dövlətinin iradəsi sarsılmazdır və heç bir kənar qüvvə buna qadir deyir. 30 il davam edən Ermənistan işğalı dövründə bircə dəfə də olsun işğalçını qınamayan, AŞPA Azərbaycanın öz suveren ərazilərində beynəlxalq hüququn norma və prinsipləri əsasında həyata keçirdiyi tədbirləri “etnik təmizləmə” kimi qələmə verməyə çalışır. Həqiqətləri bu yolla təhrif etmək, Azərbaycana qarşı yönəltməyə cəhd edirlər. Halbuki, erməni sakinlərin Qarabağı hansı formada tərk etməsi bütün dünyanın gözü önündə baş verib, yerli və xarici medialarda da bununla bağlı bir çox xəbərlər və reportajlar mövcuddur. Onların öz istəkləri ilə könüllü şəkildə getmələrini ermənilər özləri də etiraf ediblər. Amma AŞPA yenə həqiqəti görmək və eşitmək istəmir. Əvəzində Azərbaycanda qarşı növbəti kampaniya aparır.

Heç bir əsas olmadan AŞPA Qarabağda qalıb Azərbaycan qanunları əsasında yaşamağa dəvət olunan ermənilərin öz seçimi ilə rahat şəkildə, heç bir güc tətbiq olunmadan köçüb getməsini insan haqlarının pozulması kimi dəyərləndirir", - deyə A.Qarayev əlavə edib.

A.Qarayev qeyd edib ki, AŞPA ilə əməkdaşlığın dayandırılması və qurumun Azərbaycana qarşı qərəzli ittihamları ölkəmizin imicinə təsir etməyib, bundan sonra da edə bilməz.

“AŞPA-nın timsalında Azərbaycan təzyiq etmək istəyən bütün dairələr anlamalıdırlar ki, Azərbaycanla heç bir halda diktə dilində danışmaq mümkün deyil”, - deyə A.Qarayev əlavə edib.