BAKI, AzerVoice, Nailə Babazadə
Türkiyənin ticarət naziri Ömər Bolat ABŞ ilə iqtisadi münasibətlərdə yeni mərhələnin başlandığını bildirib. O, Amerikanın aparıcı şirkətlərinin Türkiyədəki sərmayələrini artırmaq istədiyini və tərəfdaşlığa müsbət yanaşdıqlarını qeyd edib.
AzerVoice xəbər verir ki,nazir, İstanbulda keçirilən "İstanbul Mebel Dizayn Sərgisi" (Furnishings & Design İstanbul) çərçivəsində jurnalistlərin suallarını cavablandırıb. ABŞ-a səfəri zamanı Türkiyə Prezidenti Rəcəb Tayyib Ərdoğanla birlikdə BMT-nin 80-ci Baş Assambleyasında iştirak etdiklərini xatırladan Bolat, orada 8-dən çox biznes görüşü keçirdiklərini deyib.
“Amerika iş dünyası Türkiyə ilə əməkdaşlığa isti baxır. Dünyanın aparıcı ABŞ şirkətlərinin Türkiyədə ciddi fəaliyyəti var və bu mövcudluğu daha da genişləndirmək istəyirlər. Yeni sərmayə layihələri planlaşdırılır,” – deyə o bildirib.
Bolat qeyd edib ki, ABŞ şirkətləri 15,5 milyard dollarlıq sərmayə ilə Türkiyədə ikinci ən böyük xarici investor mövqeyindədir. Onların ifadələrinə əsasən, bu rəqəm əslində 60 milyard dollar civarındadır.
Nazir əlavə edib ki, ABŞ-a Türkiyənin illik ixracatının yarısını məhz bu şirkətlər həyata keçirir. “İndi Türkiyə-ABŞ münasibətləri həm siyasi, həm də iqtisadi baxımdan yaxşı səviyyədədir. Son illər ərzində ən məhsuldar, ən pozitiv görüşləri bu il keçirdik. Bu da yaxın zamanda yeni investisiyaların başlanacağına işarədir,” – deyə Bolat vurğulayıb.
