Bakı, AzerVoice
ABŞ-ın yeni seçilmiş prezidenti Donald Tramp, federal ölüm
cəzasının tətbiqini qətiyyətlə davam etdirəcəyini açıqlayıb.
AzerVoice xəbər verir ki, bu bəyanat
Trampın, prezident Co Baydenin bəzi məhbusların edam cəzalarını
yüngülləşdirmək qərarına kəskin tənqidindən sonra gəlib.
Tramp, Baydenin edam cəzası alan 37 federal məhbusun cəzalarını
ömürlük həbslə əvəzləməsini "qəbuledilməz" adlandırıb və bunun
qurbanların ailələrinə hörmətsizlik olduğunu bildirib.
"Co Bayden ölkəmizin 37 ən pis qatilinin edam cəzasını
yüngülləşdirdi. Onların törətdikləri cinayətləri eşidəndə onun bu
qərarı necə verdiyinə inanmayacaqsınız. Bu, mənasız və qurbanların
yaxınlarına hörmətsiz bir qərardır." - deyə Tramp bildirib.
Tramp, prezident seçildikdən sonra federal ölüm hökmlərinin icrasını yenidən aktiv şəkildə davam etdirəcəyini vurğulayıb. O, həmçinin narkotik və insan alveri ilə mübarizədə edam cəzasının önəmli bir vasitə olduğunu müdafiə edib.
Qeyd edək ki, Co Bayden administrasiyası, ölüm hökmlərinin
əleyhinə mövqe sərgiləyərək, federal edamları dayandırmaq üçün
2021-ci ildə moratorium elan etmişdi. Bayden ötən gün verdiyi
açıqlamada, 40 məhbusdan 37-nin edam cəzasını ömürlük həbslə əvəz
etdiyini bildirərək bu addımı vicdani qərar kimi dəyərləndirib.
"Vicdanım, yeni rəhbərliyin dayandırdığım ölüm cəzalarını yenidən
başlatmasına icazə verməyəcək." -deyə o bildirib.
