Bakı,AzerVoice
ABŞ prezidenti Donald Trampın gələn həftə Almaniyada keçiriləcək
Münhen Təhlükəsizlik Konfransında Rusiyanın Ukraynaya genişmiqyaslı
işğalına son qoymaq planını təqdim edəcəyi gözlənilir.
AzerVoice xəbər verir ki, Trampın Ukrayna və
Rusiya üzrə xüsusi nümayəndəsi Keyt Kelloq illik konfransda çıxış
etmək niyyətini təsdiqləyib.
Kelloqun gələn həftə fevralın 14-16-da keçiriləcək konfransda çıxış edəcəyini bildirməsindən sonra Trampın Rusiyanın Ukraynaya davam edən genişmiqyaslı işğalına son qoymaq planını paylaşacağına dair fərziyyələr var.
Çərşənbə günü də Kreml müharibəni dayandırmaq üçün ABŞ-la təmasları artırdığını açıqlayıb. Kremlin sözçüsü Dmitri Peskov Moskvanın danışıqlara hazır olduğunu bildirib.
Zelenski isə birbaşa Putinlə görüşəcəyini, lakin ABŞ və Aİ-nin də bu danışıqlarda iştirak etməli olduğunu bildirib.
Kelloq həmçinin vurğulayıb ki, ABŞ atəşkəs əldə edildikdən sonra Ukraynada seçkilərin keçirilməsini istəyir. Zelenski müharibə bitdikdən və hərbi vəziyyət ləğv edildikdən sonra seçkilərə açıq olduğunu bildirib.
