Cənubi Koreya ABŞ-la bağlı ilk açıqlamasını verib

Cənubi Koreya ABŞ-ın ölkəni "həssas ölkələr" siyahısına salmasına ilk rəsmi reaksiya verib.

AzerVoice xəbər verir ki, Cənubi Koreyanın baş nazirinin müavini və maliyyə naziri vəzifəsini icra edən Çoi Sanq-mok, Vaşinqtonun bu qərarının iki ölkə arasındakı enerji əməkdaşlığına mənfi təsir etməməsi üçün ABŞ-la aktiv diplomatik əlaqə saxlanılmasını tapşırıb.

Çoi Sanq-mok ABŞ Energetika Nazirliyinin (DOE) Cənubi Koreyanı "həssas ölkələr" siyahısında ən aşağı kateqoriyaya yerləşdirməsi ilə bağlı narahatlığını ifadə edib. O, vəziyyətin aydınlaşdırılması üçün müvafiq dövlət qurumlarına Vaşinqtona rəsmi mövqelərini bildirməyi tövsiyə edib.

Cənubi Koreyanın sənaye naziri Ahn Duk-geun bu məsələni müzakirə etmək üçün ABŞ-dakı həmkarı ilə görüşmək üçün xüsusi tapşırıq alıb. Çoi qeyd edib ki, bu qərarın iki ölkə arasındakı elm, texnologiya və enerji sahəsindəki əməkdaşlığa zərər verməməsi üçün müzakirələr aparılmalıdır.

ABŞ Energetika Nazirliyi martın 15-də keçmiş prezident Co Bayden administrasiyasının qərarı ilə Cənubi Koreyanın "həssas ölkələr siyahısı"nda ən aşağı kateqoriyaya salındığını elan edib.

DOE-nin açıqlamasında bu siyahıya daxil edilən ölkələrin milli təhlükəsizlik, regional qeyri-sabitlik, iqtisadi təhlükəsizlik təhdidləri, terrorizmə dəstək və nüvə problemləri ilə əlaqələndirilə biləcəyi vurğulanıb.

Cənubi Koreyanın xarici işlər naziri Ço Tae-yul isə martın 11-də bildirib ki, ABŞ-ın bu ölkəni "həssas ölkələr siyahısı"na salmağı düşündüyü barədə qeyri-rəsmi məlumat əldə edib. O, bu məsələnin daha dərindən araşdırılacağını və ikitərəfli diplomatik münasibətlər çərçivəsində həll ediləcəyini bildirib.