BAKI, AzerVoice
HƏMAS, İsrailin baş naziri Binyamin Netanyahunun səfərindən sonra Macarıstanın Beynəlxalq Cinayət Məhkəməsindən (ICC) çıxmaq qərarını sərt şəkildə pisləyib.
AzerVoice xəbər verir ki, HƏMAS bəyanatında qeyd edib ki, ICC Netanyahu üçün həbs qərarı çıxarıb. Buna baxmayaraq, Macarıstan hökuməti bu qərarı nəzərə almayaraq, məhkəmədən çıxmaq barədə qərar verib.
"Macarıstanın qərarı beynəlxalq ədalət sistemini sarsıdır, cəzadan yayınmağa təşviq edir və qlobal sülh və sabitliyə birbaşa təhlükə yaradır" - deyə bəyanatda vurğulanıb.
Macarıstan hökumətinin sözçüsü Zoltan Kovacs sosial media hesabında verdiyi açıqlamada "Macarıstan Beynəlxalq Cinayət Məhkəməsini tərk edir. Dövlət naziri Gergely Gulyas hökumətin ICC-dən çıxma qərarı verdiyini açıqlayıb" sözlərini səsləndirib.
Qeyd edək ki, 21 noyabr 2024-cü ildə ICC, Netanyahu və keçmiş müdafiə naziri Yoav Gallant üçün "Qəzzada törədilən müharibə cinayətləri və insanlığa qarşı cinayətlər" səbəbilə həbs qərarı çıxardığını elan etmişdi.
