Suriyanın İdlib əyalətindəki düşərgələrdən 308 məcburi köçkün ailənin ölkənin beş əyalətində yerləşən doğma yaşayış məntəqələrinə qayıtması üçün karvan yola düşüb.
ArabAZ xəbər verir ki,ailələr İdlib, Həma, Homs, Dəməşq ətrafı və Hələb əyalətlərindəki yaşayış məntəqələrinə qayıdır. Qayıdış proqramı İdlib qubernatorluğunun təşəbbüsü ilə Sosial Məsələlər və Əmək İdarəsi, BMT-nin Qaçqınlar üzrə Ali Komissarlığı (UNHCR), “Muzn” təşkilatı, Suriya Ərəb Qızıl Aypara Cəmiyyəti və Fövqəladə Hallar və Fəlakətlərin İdarə Edilməsi İdarəsi ilə koordinasiya şəraitində həyata keçirilir.
Təşəbbüsün məqsədi ailələrin doğma ərazilərində şərait yaxşılaşdıqca onların təhlükəsiz və ləyaqətli şəkildə geri qayıtmasını təmin etmək, həmçinin logistika və zəruri ləvazimatlarla dəstək göstərməkdir.
İdlib Sosial Məsələlər və Əmək İdarəsinin şimal şöbəsinin direktoru Məhəmməd Bakir bildirib ki, sonuncu karvan yerli və beynəlxalq təşkilatlarla birgə həyata keçirilən daha geniş qayıdış planının bir hissəsidir. Onun sözlərinə görə, hakimiyyət orqanları ailələrin toplanış məntəqələrindən kənd və şəhərlərinə çatdırılmasını koordinasiya edir. Bakir İdlibin ilin sonunadək düşərgələrdəki çadırların tamamilə aradan qaldırılması hədəfinə çatacağına ümid etdiyini bildirib.
Qayıdan ailələrdən biri yeddi illik məcburi köçkünlükdən sonra Məarrət ən-Numana qayıdan Abdullah Əhməd Dadudur. O, düşərgədə keçirdiyi çətin illərdən sonra qayıdışı ailəsi üçün yeni başlanğıc kimi qiymətləndirib.
Digər qayıdan şəxs Əbu əl-Duhur sakini Əbdülməlik əl-Əhməd isə yaşayış məntəqələrində əsas xidmətlərin bərpa olunacağına və ailələrin həyatlarını yenidən qurmasına imkan yaradılacağına ümid etdiyini bildirib.
Bu qayıdışdan əvvəl sentyabrın 1-də 186 ailə İdlib düşərgələrindən ölkənin beş əyalətindəki doğma yaşayış məntəqələrinə yola salınıb. İdlib qubernatorluğu və beynəlxalq tərəfdaşları məcburi köçkünlərin qayıdış proqramları ilə yanaşı, onların yerləşdirildiyi ərazilərdə infrastrukturun bərpası və əsas xidmətlərin yenidən təmin edilməsi istiqamətində işləri davam etdirir.
