Bakı. AzerVoice:
Gürcüstan parlamentin spikeri Şalva Papuaşvili "Xarici təsirin şəffaflığı haqqında" qanun layihəsini prezident Salome Zurabişvilinin əvəzinə özünün imzalayacağını bildirib.
AzerVoice xəbər verir ki, Papuaşvili bu barədə mətbuat konfransında deyib.
"Qanu dünən prezident administrasiyasına göndərilib. Hazırda imzanı gözləyirik. Böyük ehtimalla, Zurabişvili qanunu imzalamayacaq. Müvafiq olaraq, qanunu mən imzalayacağam", - o deyib.
Xatırladaq ki, mayın 14-də Gürcüstan parlamenti "Xarici təsirin şəffaflığı haqqında" qanun layihəsini yekun, üçüncü oxunuşda qəbul edib. Qanun layihəsi xarici maliyyələşdirilməsi 20 faizi ötən QHT və KİV-in xüsusi reyestrdə qeydiyyatdan keçməsini və hər il bəyannamə doldurmasını tələb edir.
Gürcüstan prezidenti Salome Zurabişvili mayın 18-də qanun layihəsinə veto qoymuşdu.
Gürcüstan parlamentinin Hüquqi Məsələlər Komitəsi mayn 27-də keçirilən iclasda ölkə prezident Salome Zurabişvilinin "Xarici təsirin şəffaflığı haqqında" haqda qanun layihəsinə vetosunu ləğv edib.
Prosedura əsasən, veto aradan qaldırıldıqdan sonra üç gün ərzində qanun yenidən imzalanması üçün prezidentə göndərilir. Dövlət başçısı 5 gün ərzində qanunu imzalamadıqda qanun parlamentin spikeri tərəfindən imzalanır və qüvvəyə minir.
