Bakı, VOA
Boliviyada prezident Luis Arce hökumətinə qarşı hərbi çevriliş cəhdindən sonra başlayan istintaq çərçivəsində 17 nəfər saxlanılıb.
VOA xəbər verir ki, bu barədə Boliviyanın daxili işlər naziri Eduardo del Kastillo mətbuata verdiyi açıqlamada qeyd edib.
Saxlanılanlar arasında işdən çıxarılan general Xose Zuniqa və vitse-admiral Xuan Arnezin də olduğunu deyən Kastillo çevriliş cəhdi ilə bağlı daha bir neçə nəfərin axtarıldığını bildirib.
Yerli media saxlanılan şəxslərin “silahlı üsyan və terrorizm”də ittiham edildiyini və onlara 20 ilə qədər həbs cəzası verilə biləcəyini yazıb.
“Biz demokratiyanı və Boliviya xalqının iradəsini nəyin bahasına olursa olsun müdafiə edəcəyik. Boliviya xalqının əksəriyyətinin qanuni olaraq seçdiyi hökumətimizə qarşı çevriliş cəhdi qarşısında qardaş ölkələrin dövlət başçılarının və beynəlxalq ictimaiyyətin göstərdiyi həmrəyliyə görə minnətdaram.” – deyə Boliviya prezidenti Luis Arse qeyd edib.
Xatırladaq ki, Boliviya prezidenti Arce dünən ölkədə bəzi hərbi hissələrin qeyri-qanuni səfərbər edildiyini bəyan edərək ordudan demokratiyaya hörmətlə yanaşmağı istəyib.
Sosial şəbəkələrdə yayılan görüntülərdə hərbi zirehli maşının inzibati paytaxt La Pazda hökumət sarayına daxil olmağa çalışdığı əks olunub.
Əsgərlərə reaksiya göstərən vətəndaşlara bibər qazı və təzyiqli su ilə müdaxilə edilib.
Hafiz Rufizoğlu
