BAKI, AzerVoice
Rusiya Birbaşa İnvestisiyalar Fondu (RDIF) və Qətər İnvestisiya Təşkilatı (QIA) arasında texnologiya, təbii sərvətlərin hasilatı və səhiyyə sahələrini əhatə edən 2 milyard ABŞ dolları dəyərində ortaq investisiya fondunun yaradılması haqqında razılıq əldə olunub.
AzerVoice xəbər verir ki, sözügedən müqavilə Rusiya Prezidenti Vladimir Putin və Qətər Əmiri Şeyx Təmim bin Hamed Al Taninin iştirakı ilə Kreml sarayında imzalanıb.
Rusiya tərəfi fondun yaradılmasının ölkənin yüksək texnologiyalar sahəsindəki inkişaf strategiyasına, Qətər tərəfi isə beynəlxalq investisiya imkanlarının genişləndirilməsinə töhfə verəcəyini vurğulayıb.
Yeni ortaq fondun məqsədi yalnız iqtisadi mənfəət deyil, həm də strateji sahələrdə – xüsusilə innovativ texnologiyalar, enerji resurslarının çıxarılması və səhiyyə xidmətlərinin təkmilləşdirilməsi sahələrində dayanıqlı əməkdaşlığın təmin edilməsidir. Fondun vəsaitləri birgə təsdiqlənmiş layihələrə yönəldiləcək və hər iki tərəf layihələrin planlaşdırılması və icrasında aktiv iştirak edəcək.
Müqavilənin imzalanması mərasimindən sonra Rusiya və Qətər nümayəndə heyətləri arasında bir sıra digər ikitərəfli sazişlər də imzalanıb. Bu sənədlər əsasən enerji, nəqliyyat, mədəniyyət və təhsil sahələrində əməkdaşlığı əhatə edir və iki ölkə arasında siyasi və iqtisadi münasibətlərin daha da dərinləşməsinə yönəlib.
Bu təşəbbüs, həm də Qətərin neft-qaz ixracına əsaslanan iqtisadiyyatını daha diversifikasiya etməyə çalışdığı və Rusiyanın isə Qərb sanksiyalarına qarşı alternativ iqtisadi tərəfdaşlar axtardığı bir dövrdə həyata keçirilir.
