BAKI, AzerVoice
31 mindən çox oğurlanmış bank parolunun kiber hücumçular tərəfindən Avstraliyada Telegram kimi mesajlaşma proqramlarında və qaranlıq internetdə paylaşıldığı bildirilir.
AzerVoice xəbər verir ki, Avstraliya Yayım Korporasiyasının məlumatına görə, bir qrup kiberkəşfiyyat tədqiqatçısının apardığı araşdırma nəticəsində məlum olub ki, istifadəçilərin şəxsi cihazlarından giriş məlumatı zərərli proqramlar vasitəsilə oğurlanıb.
Araşdırmada kiberhücum qruplarının Telegram kimi mesajlaşma proqramlarında və qaranlıq internetdə 31mindən çox oğurlanmış bank parolunu paylaşdığı və bəzilərini satışa təqdim etdiyi qeyd edilib.
Qlobal miqyasda 31 milyondan çox cihazda zərərli proqram aşkar edilsə də, təkcə Avstraliyada 58 mindən çox cihazın belə zərərli proqramdan təsirləndiyi bildirilir.
Avstraliya kibertəhlükəsizlik firması Dvuln-un qurucusu Jamie O'Reilly, bu zərərli proqramların 2021-ci ildən bəri bəzi cihazlara çıxışı olduğunu və bəzi insanların hələ də hücumlara qarşı həssas olduğunu bildirdi.
Avstraliya səlahiyyətliləri vətəndaşlara təhlükəsizlik proqramlarını yeni saxlamaq və onlayn şübhəli fəaliyyətə qarşı ayıq olmaq barədə xəbərdarlıq edib.
Bu ayın əvvəlində ölkədəki bəzi pensiya fondlarının da kiberhücuma məruz qaldığı, oğurlanmış 600 üzvə məxsus parolların hesablara icazəsiz giriş və fırıldaq cəhdlərində istifadə edildiyi üzə çıxıb.
