BAKI, AzerVoice

Vyetnam hökuməti bu ilin əvvəlindən etibarən elektron siqaretlərin və onların mayelərinin saxlanması, satışı və istifadəsini tam şəkildə qadağan edib.

AzerVoice xəbər verir ki, qadağanı pozan şəxslər 2 milyon dong (təxminən 78,5 ABŞ dolları) məbləğində cərimə edilə bilər.

Elektron siqaretləri idxal edən, satan, daşıyan və ya istehsal edən şəxsləri isə 3 milyard dong cərimə və ya 15 ilə qədər həbs cəzası gözləyir.

Vyetnam bu addımı ilə elektron siqaretlərə qarşı sərt tədbirlər görən ölkələr Avstraliya, Türkiyə, Sinqapur, Meksika, Hindistan, Braziliya, Maldiv adaları və Tailandın sırasına qoşulmuş olur. Bu ölkələrdə əsas narahatlıq, elektron siqaretlərin xüsusilə gənclər arasında yayılması və onların sağlamlığına təsiridir.

Səhiyyə rəsmiləri bu qərarın, ağciyərlərdə geri dönüşü olmayan zədələnmələr riskinə qarşı atıldığını bildirirlər. Eyni zamanda qeyd olunur ki, siqareti tərgitməyə kömək etdiyi iddia edilən bu cihazların rəngli dizaynları və şirin dadları gənc istifadəçilər üçün cəlbedici hal alıb.

Turistlərə isə məsləhət görülür ki, səfərdən əvvəl elektron siqaret cihazlarının həmin ölkəyə gətirilməsinin qanuni olub-olmadığını diqqətlə araşdırsınlar. Xüsusilə Tailand kimi sərt qanunlara sahib ölkələrdə bu cür qayda pozuntuları ağır cəza ilə nəticələnə bilər.