BAKI, AzerVoice
ABŞ Prezidenti Donald Tramp Ukraynada həm atəşkəs rejiminin tətbiqi, həm də münaqişənin sülh yolu ilə həllinin tərəfdarıdır.
AzerVoice xəbər verir ki, bu barədə Ağ Evin mətbuat katibi Kerolayn Livitt jurnalistlər üçün keçirilən ənənəvi brifinqdə məlumat verib.
"Tramp bu münaqişənin (Ukraynadakı – red.) ona sabiq prezident Co Baydendən miras qaldığını dəfələrlə açıq şəkildə bildirib. Unutmayın ki, bu müharibə əvvəlki administrasiyanın bacarıqsızlığı və zəifliyi səbəbindən başladı. Tramp isə bu vəziyyəti düzəltmək üçün əlindən gələni edir. O, hər iki tərəfə aydın şəkildə bildirib ki, mümkün qədər tez həm atəşkəsə, həm də sülh razılaşmasına nail olmaq istəyir" – deyə, Livitt vurğulayıb.
Qeyd edək ki, Tramp daha əvvəl Truth Social sosial şəbəkəsində paylaşım edərək, bugün yerli vaxtla saat 10:00-da Rusiya Prezidenti Vladimir Putinlə telefon danışığı aparacağını açıqlamışdı. ABŞ lideri söhbətin əsas mövzularının Ukraynadakı vəziyyətin nizamlanması və ticarət əlaqələri olacağını bildirmişdi. Tramp əlavə etmişdi ki, Putinlə danışdıqdan sonra Ukrayna Prezidenti Vladimir Zelenski və NATO ölkələrinin liderləri ilə də əlaqə saxlayacaq. Tramp və Putin arasında telefon danışığı ən son martın 18-də baş tutmuşdu.
