ABŞ Prezidenti Donald Tramp Nyu-Meksiko ştatının adının “Yeni Amerika” olaraq dəyişdirilməsi ideyasını dəstəkləyən paylaşımlar edib. O, Əmək Günündə sosial şəbəkələrdə ştatın yeni adla göstərildiyi xəritələr yayımlayıb.

ArabAZ xəbər verir ki, Tramp bazar günü ştatın adının dəyişdirilməsi ilə bağlı təkliflər aldığını və bu ideyanı bəyəndiyini bildirib. O, yeni adın ştat üçün daha “nüfuzlu və gözəl” olacağını deyib.

Tramp bazar ertəsi ABŞ xəritələrinin bir neçə variantını paylaşaraq Nyu-Meksiko ərazisini “Yeni Amerika” adı ilə göstərib.

ABŞ prezidentinin bu təşəbbüsü Meksika ilə ticarət danışıqlarının gərginləşdiyi bir vaxta təsadüf edir.

Tramp ötən ay Kanada ilə ticarət danışıqlarından nəticə əldə olunmamasından sonra Ontario gölünün adının “Amerika gölü” olaraq dəyişdirilməsi barədə qərar vermişdi.

Lakin ABŞ federal hökumətinin bir ştatın adını dəyişdirmək səlahiyyəti yoxdur.

Hazırda Nyu-Meksiko ştatının qubernatoru Demokratlar Partiyasının nümayəndəsi Mişel Luhan Qrişamdır. O, 2019-cu il yanvarın 1-dən bu vəzifədədir və 2022-ci ildə yenidən seçilib.

Qubernator Trampın təklifinə münasibət bildirərək Nyu-Meksiko adının müzakirə mövzusu olmadığını vurğulayıb. O qeyd edib ki, bu ad ABŞ mövcud olmamışdan əvvəl də ştata aid olub.