BAKI, AzerVoice
Pakistan Hindistanı məktəb avtobusuna edilən bombalı hücumda ittiham edir.
AzerVoice xəbər verir ki, Pakistanın
Bəlucistan əyalətində məktəb avtobusuna qarşı həyata keçirilən və
azı 5 nəfərin ölümünə, bir çox uşağın isə yaralanmasına səbəb olan
bombalı hücumun Hindistan tərəfindən planlaşdırıldığı iddia
olunub.
Rəsmilər bu hücumun arxasında Hindistan dövlətinin dayandığını
bildirirlər.
Məlumata görə, Pakistan Ordusunun İctimaiyyətlə Əlaqələr İdarəsi (ISPR) insidentlə bağlı rəsmi açıqlama yayıb. Açıqlamada bildirilir ki, üçü uşaq olmaqla 5 nəfər həlak olub, çox sayda məktəbli yaralanıb. Qurumun bəyanatında “Terrorçu Hindistan dövlətinin Bəlucistanda vəkil ünsürləri vasitəsilə planlaşdırdığı və həyata keçirdiyi qorxaq hücumda tələbələri daşıyan avtobus qəsdən hədəfə alınıb” ifadəsinə yer verilib.
Pakistan tərəfi hücumu “Hindistanın terrorizmdən dövlət siyasəti kimi istifadə etməsinin bariz nümunəsi” adlandırıb və hücumu təşkil edənlərin, onlara yardım edənlərin və icra edənlərin ədalət qarşısında cavab verəcəyini, Hindistanın “əsl simasının” dünya ictimaiyyətinə göstəriləcəyini bildirib.
Bəlucistan vilayətinin rəsmisi, komissar müavini Yasir İqbal Dəşti hücumun "Sıfır Nöqtəsi" kimi tanınan sərhəd bölgəsinə yaxın ərazidə baş verdiyini açıqlayıb. O qeyd edib ki, istintaq davam edir və ilkin məlumatlara əsasən hücumun qəsdən ola biləcəyi ehtimal olunur.
Pakistanın Daxili İşlər Naziri Möhsün Naqvi də Nazirliyin X sosial media platformasındakı paylaşımında hücumu qəti şəkildə pisləyib. “Düşmən vəhşilik nümayiş etdirərək günahsız uşaqlara hücum edib. Məktəb avtobusuna edilən hücum, ölkədə sabitliyi pozmağa yönəlmiş bir terror aktıdır”, – deyə nazir bəyan edib.
Qeyd edək ki, Hindistanla Pakistan arasında gərgin münasibətlər son illərdə bir sıra sərhəd insidentləri və qarşılıqlı ittihamlarla daha da dərinləşib. Bəlucistan əyalətində baş verən bu son hücum, bölgədəki sabitlik və təhlükəsizliklə bağlı narahatlıqları bir daha gündəmə gətirib.
