BAKI, AzerVoice
Putin müharibəni bitirməyə hazır deyil.
AzerVoice xəbər verir ki, ABŞ Prezidenti Donald Tramp bəzi Avropa liderləri ilə telefon danışıqlarında Rusiya-Ukrayna müharibəsi ilə bağlı diqqətçəkən fikirlər səsləndirib. “Wall Street Journal”ın görüşlə tanış olan üç mənbəyə istinadla yaydığı məlumata görə, Tramp bildirib ki, Rusiya prezidenti Vladimir Putin müharibəni dayandırmağa hazır deyil, çünki "özünü qalibiyyətə yaxın hiss edir".
Məlumata görə, Tramp mayın 18-də Fransa Prezidenti Emmanuel Makron, Almaniya kansleri Fridrix Merz, İtaliya Baş naziri Giorgia Meloni və Böyük Britaniya Baş naziri Keir Starmerlə telefon əlaqəsi saxlayıb. Mayın 19-da isə Ukrayna Prezidenti Vladimir Zelenski və Avropa Komissiyasının rəhbəri Ursula fon der Leyenlə danışıqlar aparıb.
Həmin danışıqlardan sonra Tramp özünün "Truth Social" platformasında yazaraq, Rusiya prezidenti Putinlə iki saatlıq görüş keçirdiyini və bu görüşün uğurlu olduğunu qeyd edib. “İnanıram ki, bu çox yaxşı keçdi. Rusiya və Ukrayna dərhal atəşkəs və müharibənin sona çatması üçün danışıqlara başlayacaq” - deyə o bildirib.
Trampın bəyanatları Moskvanın daha əvvəl sülhə hazır olduğu barədə verdiyi açıqlamalarla ziddiyyət təşkil edir. Görüşdən məlumatlı mənbələrin iddiasına görə, Tramp Avropa liderlərinə bildirib ki, əgər Rusiya atəşkəslə razılaşmasa, Moskvaya qarşı yeni sanksiyalar tətbiq oluna bilər.
O, həmçinin qeyd edib ki, müharibə bitdikdən sonra Rusiya ABŞ-la genişmiqyaslı ticarətə başlamaq istətir və bu barədə razılıq əldə olunduğunu vurğulayıb.
