BAKI, AzerVoice
Səudiyyə Ərəbistanı Pakistan və Hindistan arasında aparılan danışıqlar üçün "neytral məkan" ola bilər.
AzerVoice xəbər verir ki, bu barədə Pakistanın Baş naziri Məhəmməd Şahbaz Şərif İslamabad şəhərində jurnalistlərlə görüş zamanı bildirib.
Şərif qeyd edib ki, Hindistanla danışıqların əsas mövzuları Kəşmir münaqişəsi, su ehtiyatlarının paylaşdırılması, ticarət və terrorla mübarizə olacaq. O, eyni zamanda vurğulayıb ki, Çin bu danışıqlar üçün neytral məkan ola bilməz. O, Səudiyyə Ərəbistanının hər iki tərəfin razılaşa biləcəyi bir yerə çevriləcəyinə ümid etdiyini bildirib.
Şərif əlavə edib ki, əgər bu cür danışıqlar baş tutsa, Pakistan nümayəndə heyətinə ölkənin milli təhlükəsizlik müşaviri rəhbərlik edəcək. Onun sözlərinə görə, son zamanlar hərbi dairələr arasında təmaslar nəticəsində Pakistan-Hindistan münasibətlərində müəyyən yumşalma müşahidə olunur.
Qeyd edək ki, Hindistan hökumətinin koordinatorluğu ilə müxtəlif siyasi partiyaların nümayəndələri və tanınmış siyasi fiqurlardan ibarət nümayəndə heyətinin yaxın günlərdə Səudiyyə Ərəbistanına səfəri gözlənilir.
Hindistan mediasının məlumatına görə, bu səfərin məqsədi Hindistanın mövqeyini izah etməkdir. Hindistanın Parlament İşləri Nazirliyi bildirib ki, bütün partiyalardan ibarət bu heyət Hindistanın terrorla mübarizədə milli həmrəyliyini və sərt mövqeyini əks etdirəcək.
