BAKI, AzerVoice
Trampın ticarət tarifləri ABŞ-a turist axınına zərbə vurub.
AzerVoice xəbər verir ki, prezident Donald Trampın tətbiq etdiyi sərt idxal tarifləri nəticəsində Yaponiya, Kanada, Meksika və Almaniyadan ABŞ-a səfərlərin sayı kəskin şəkildə azalıb.
Trivago mehmanxana rezervasiya platformasının məlumatlarına görə, adıçəkilən ölkələrdən ABŞ-a sifarişlər iki və ya birrəqəmli geriləyib. Trampın Kanadaya qarşı 25 faizlik tarif qərarı və bu ölkəni “51-ci ştat” adlandırması Kanadada sərt etirazla qarşılanıb. Almaniyadan edilən rezervasiyalarda da azalma qeydə alınıb.
ABŞ-ın 2,6 trilyon dollarlıq turizm sənayesi “Tramp effekti” adlandırılan bu qeyri-müəyyənlikdən narahatdır. Milli Səyahət və Turizm Bürosunun məlumatına görə, 2025-ci ilin mart ayında ölkəyə gələn xarici turistlərin sayı əvvəlki illə müqayisədə 11,6 faiz azalıb.
Bundan əlavə, amerikalı turistlər də daha qənaətcil seçimlərə üstünlük verərək, aşağı reytinqli otellərə yönəlir.
Qeyd edək ki, Britaniyalı turistlər ABŞ-ı deyil, ölkə daxilində istirahətə üstünlük verir. Trivago-nun məlumatına görə, İngiltərənin daxili turizmində 25 faizlik artım müşahidə olunub. Ən çox seçilən istiqamətlər arasında London, Edinburq, York, Blekpul və Mançester yer alır.
