BAKI, AzerVoice
Fransada 15 yaşdan kiçik qızlara hicab qadağası təklifi siyasi bölünməyə səbəb olub.
AzerVoice xəbər verir ki, Fransa prezidenti Emmanuel Makronun partiyası daxilində keçmiş baş nazir Qabriel Attalın 15 yaşdan kiçik qızların ictimai yerlərdə hicab taxmasının qadağan olunması təklifi ciddi fikir ayrılığına yol açıb.
Attal bu çağırışı "siyasi İslam"la mübarizə çərçivəsində irəli sürüb və azyaşlı qızları hicab taxmağa məcbur edən valideynlərə qarşı cinayət məsuliyyəti tətbiqini təklif edib. Lakin Təhsil naziri Elisabeth Borne bu təşəbbüsün konstitusiyaya uyğunluğuna şübhə ilə yanaşdığını bildirib.
Baş nazir Fransua Bayru isə Attalın təklifinin praktik olaraq necə həyata keçiriləcəyinə dair suallar qaldıraraq, küçədə azyaşlı qızların polis tərəfindən sənəd yoxlamasına məruz qalmasının mümkünlüyünü sorğulayıb.
Qeyd edək ki, məsələ Fransada yayımlanan “Fransada Müsəlman Qardaşlığı və Siyasi İslam” adlı hökumət hesabatından sonra yenidən gündəmə gəlib. Hesabatda 139 ibadət məkanı və 21 məktəbin “Müsəlman Qardaşlar” hərəkatı ilə əlaqəsi olduğu iddia olunur. Daxili işlər naziri Bruno Retailleau bu hərəkatla mübarizə üçün yeni hüquqi addımlar və tədbirlər planını açıqlayıb.
