BAKI, AzerVoice
ABŞ administrasiyası polad idxalına tətbiq edilən gömrük rüsumunu 25 faizdən 50 faizə qaldırmaq niyyətindədir.
AzerVoice xəbər verir ki, bu barədə ABŞ Prezidenti Donald Tramp bildirib.
“Biz tarifləri 25 faiz artıracağıq. ABŞ-a idxal olunan polad üçün tətbiq edilən gömrük rüsumlarını 25 faizdən 50 faizə qədər yüksəldəcəyik. Bu addım ABŞ polad sənayesinin təhlükəsizliyini daha da möhkəmləndirəcək” - deyə, o Tramp vurğulayıb.
Qeyd edək ki, ABŞ Federal Beynəlxalq Ticarət Məhkəməsi çərşənbə günü Trampın idxala rüsum tətbiq etmək qərarının icrasını prezident səlahiyyətlərinin aşılması səbəbindən bloklayıb. Məhkəmə Trampın aprelin 2-də 185 ölkə və regiondan idxal edilən məhsullara tətbiq etmək istədiyi rüsumları, eləcə də Kanada, Çin və Meksikadan idxal edilən məhsullara əvvəlcədən tətbiq edilən tarifləri də əhatə edərək qərar verib. Lakin qərar avtomobil və onun hissələri, polad və alüminium idxalına tətbiq edilən tariflərə aid olmayıb.
Cümə axşamı ABŞ apellyasiya məhkəməsi müvəqqəti olaraq gömrük rüsumlarının bloklanması ilə bağlı qərarın icrasını dayandırıb. Ağ Evin mətbuat katibi Kerolayn Livitt brifinqdə bildirib ki, ABŞ administrasiyası bu məsələni Ali Məhkəməyə qədər daşımaq niyyətindədir.
