BAKI, AzerVoice
ABŞ prezidenti Donal Tramp bildirib ki, ABŞ İsrail ilə İran arasındakı münaqişəyə müdaxilə edə bilər.
AzerVoice xəbər verir ki, bu barədə ABC kanalı məlumat yayıb.
Bununla yanaşı Tramp, Truth Social platformasında İsrail-İran müharibəsi ilə bağlı paylaşımında iki ölkə arasında sülhün olacağını bildirib.
“Tezliklə İsrail və İran arasında da sülh olacaq. Hal-hazırda bir neçə görüşlər və iclaslar keçirilir” - deyə, o vurğulayıb.
Tramp, bu münaqişənin Hindistan-Pakistan arasında əldə edilən razılaşmaya bənzər bir şəkildə sona çatdırıla biləcəyini qeyd edib.
“İran və İsrail bir razılaşma əldə etməlidir və edəcək. Mən ABŞ-ın ticarət gücündən istifadə etməklə, liderlər arasında məntiqli, uyğun və sağlam düşüncəli danışıqları təşviq edərək bu cür böhranların qarşısını alıram”, - Tramp bildirib.
O, prezidentliyi dövründə Serbiya və Kosovo, eləcə də Misir və Efiopiya arasında yaranmış su mübahisələrinə uğurla müdaxilə etdiyini qeyd edib.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
