BAKI, AzerVoice
Hazırkı mürəkkəb regional şəraitdə İran ilə Rusiya arasında koordinasiyanın gücləndirilməsi vacib və zəruridir.
AzerVoice xəbər verir ki, bu barədə İranın xarici işlər naziri Seyid Abbas Ərakçi bildirib.
Onun sözlərinə görə, Moskvaya səfəri əvvəlcədən planlaşdırılıb və İstanbul görüşündən dərhal sonra reallaşdırılıb. Səfərin əsas məqsədi İsrailin İrana qarşı həyata keçirdiyi hava hücumları və regionda yaranmış gərginliklə bağlı Rusiya prezidenti Vladimir Putinlə birbaşa müzakirələr aparmaqdır.
Araqçi qeyd edib ki, ABŞ-nin İranın nüvə obyektlərinə hücumu beynəlxalq hüququn pozulması və açıq təcavüz aktıdır. Onun fikrincə, bu hücum Rusiya ilə məsləhətləşmələrin və əməkdaşlığın daha geniş və dərin səviyyədə aparılmasını zəruri edir.
Nazir, Rusiyanın son hücumlara qarşı sərt mövqeyini və bu təcavüzü açıq şəkildə qınamasını yüksək qiymətləndirib və bu mövqeyin beynəlxalq təşkilatlarda da dəstəklənəcəyinə ümid etdiyini bildirib.
“BMT Təhlükəsizlik Şurası və digər beynəlxalq platformalarda konkret və praktiki addımların atılmasını gözləyirik”- deyə o bildirib.
Xatırladaq ki, 22 iyun tarixində ABŞ Hərbi Hava Qüvvələri İranın Fordo, Natanz və İsfahandakı üç nüvə obyektinə zərbə endirib. Hücumlar nəticəsində obyektlərin ciddi şəkildə zədələndiyi bildirilir.
