BAKI,AzerVoice
ABŞ Prezidenti Donald Trampın İsrail və İran arasında atəşkəs elan etməsindən sonra dünya bazarlarında neft qiymətləri kəskin şəkildə ucuzlaşıb, səhmlər isə artıb.
AzerVoice xəbər verir ki, Tramp atəşkəsin yaxın saatlarda qüvvəyə minəcəyini bildirib.
İranın xarici işlər naziri rəsmi atəşkəs razılaşmasının əldə olunmadığını desə də, Tehran İsrailin “təcavüzünü” dayandıracağı halda hücumlarını davam etdirməyəcəyini bəyan edib. İsrail tərəfi hələlik məsələyə münasibət bildirməyib.
Tramp bu atəşkəsi “12 günlük müharibənin sonu” kimi qiymətləndirib. Xatırladaq ki, bazar ertəsi İran Qətərdəki ABŞ hərbi bazasına zərbə endirib. Bu hücüm Vaşinqtonun əvvəlki günlərdə İranın nüvə obyektlərinə endirdiyi hava hücumlarına cavab idi.
Atəşkəslə bağlı xəbərlərdən sonra Hörmüz boğazının bağlanması təhlükəsi azaldığı üçün neftin qiyməti enib. Qeyd edək ki, dünya üzrə neft və qazın təxminən 20 faizi bu dar dəniz yolundan keçir.
Trampın açıqlaması qlobal fond bazarlarında da canlanma yaradıb. ABŞ-ın S&P 500 indeksinin fyuçersləri 0,58 faiz artaraq 6,112.00-ə, Dow Jones isə 0,51 faiz artaraq 43,118.00-ə çatıb.
Birləşmiş Ştatlar Dollar İndeksi 0,32 faiz azalaraq 98.10 səviyyəsinə düşüb. Eyni zamanda avro dollar qarşısında 0,25 faiz dəyər qazanıb, yen isə 0,48 faiz dəyər itirib.
Allianz Global Investors şirkətinin baş investisiya direktoru Qreq Hirt bildirib ki, dollar İran–İsrail münaqişəsi fonunda qısamüddətli yüksəliş yaşasa da, ABŞ-ın əkiz büdcə və ticarət kəsiri kimi struktur problemləri və Tramp administrasiyasının qeyri-sabit tarif siyasəti dolların dəyərinə mənfi təsir göstərməkdə davam edir.
