BAKI, AzerVoice

ABŞ Prezidenti Donald Tramp, güclü yağışlar və Qvadelupa çayının daşması nəticəsində baş verən sel fəlakətindən ən çox zərər çəkmiş Texas ştatının Kerr dairəsində fövqəladə vəziyyət rejimi elan edib.

AzerVoice xəbər verir ki, müvafiq açıqlamanı o, "Truth Social" platformasında yayımlayıb.

Tramp qeyd edib ki, fövqəladə vəziyyətin tətbiqi xilasetmə xidmətləri əməkdaşlarına zəruri resursların dərhal ayrılmasına imkan verəcək.

Son məlumatlara görə, Texasın mərkəzi hissəsində baş vermiş daşqınlar nəticəsində azı 59 nəfər həlak olub. Texas qubernatoru Qreq Abbott daha əvvəl bildirmişdi ki, 850-dən çox insan təxliyə olunub.

Tramp əlavə edib ki, federal hökumət ştatın fövqəladə xidmətlərinə daşqınların nəticələrinin aradan qaldırılmasında yardım göstərir.

Qeyd edək ki, şənbə günü ABŞ-ın daxili təhlükəsizlik naziri Kristi Noem də vəziyyətlə yerində tanış olmaq üçün Texas ştatına səfər edib.