BAKI, AzerVoice
Almaniyanın ən böyük müdafiə sənayesi şirkətlərindən biri olan "Rheinmetall" 2030-cu ilə qədər satış həcmini 40–50 milyard avroya çatdırmağı və Almaniyada minlərlə yeni iş yeri yaratmağı planlaşdırır.
AzerVoice xəbər verir ki, bu barədə konsernin rəhbəri Armin Papperger “Bild” qəzetinə müsahibəsində bildirib.
“Bizim məqsədimiz satış həcmini 2030-cu ilə qədər 40–50 milyard avroya qədər artırmaqdır” – deyə, Papperger bildirib. Onun sözlərinə görə, bu, Rusiya-Ukrayna müharibəsindən əvvəlki dövrlə, yəni 2021-ci illə müqayisədə təxminən onqat artım deməkdir.
"Rheinmetall" yalnız Almaniyadan ümumilikdə 70 milyard avro dəyərində sifariş gözləyir.
“Hazırda 6-7 min ədəd texnikanın alınması ilə bağlı danışıqlar aparılır. Bu texnikalar yeni hərbi briqadaların təchizatı üçün nəzərdə tutulub” – deyə, Papperger qeyd edib. Sifarişlər arasında "Leopard 2" tankları, "Puma" və "Boxer" zirehli döyüş maşınları da var. Onun sözlərinə görə, təkcə növbəti 12 ay ərzində şirkət yalnız Almaniyadan 70 milyard avroya qədər sifariş ala bilər.
Hazırda "Rheinmetall" 10 yeni zavodun tikintisini həyata keçirir və əsas diqqət Almaniya və Avropa İttifaqı ölkələrinə yönəlib.
“İstehsalı bərpa etməliyik. İşçi sayı isə mövcud 40 mindən 70 minə qədər artırılacaq. Biz iş yerlərini burada – Almaniyada yaratmaq istəyirik” – deyə, o bildirib.
Papperger ABŞ-ın gömrük siyasətinə də toxunaraq qeyd edib ki, Donald Trampın prezidentliyi dövründə şirkət üçün hər hansı mənfi təsir gözləmir:
“Tramp yaxşı alqı-satqı bacarığına malikdir. Əgər ona bu işin hər kəs üçün sərfəli olduğunu desək, problem olmaz.”
Qeyd edək ki, "Rheinmetall" Almaniyanın ən iri müdafiə şirkətidir. Şirkət Kiyevə tanklar, sursat və digər hərbi texnika tədarük edir və Ukraynada sursat istehsalı üçün zavod inşa edir. Ukrayna həmçinin şirkətin yeni "Lynx" zirehli transportyorunu test edir və gələcəkdə bu texnikanın da "Rheinmetall" tərəfindən Ukraynada istehsal olunması planlaşdırılır.
Hazırda şirkətin səhm qiyməti bazarda "BMW", "Mercedes-Benz" və "Volkswagen"i geridə qoyub. Qərb ölkələrinin müdafiə şirkətləri arasında bazar dəyərinə görə yalnız ABŞ-ın "Lockheed Martin" şirkəti "Rheinmetall"dan öndədir.
