Çin ABŞ və İran arasında davam edən qarşıdurmanın dayandırılması və Yaxın Şərqdə sülhün təmin olunması üçün vasitəçilik etməyə hazır olduğunu bildirib. Pekin BRICS ölkələri ilə birlikdə regional sabitliyin bərpasına töhfə vermək niyyətindədir.
ArabAZ xəbər verir ki, Çin Sədri Si Cinpin Yeni Dehlidə keçirilən BRICS Sammiti çərçivəsində “Sinxua” agentliyinə açıqlamasında ölkəsinin diplomatik prosesdə rol oynamağa hazır olduğunu deyib.
“Çin BRICS üzvləri ilə birlikdə Yaxın Şərq və Körfəz regionunda sülh və sabitliyin təmin olunmasında rol oynamağa hazırdır”, – Si Cinpin bildirib.
Çin lideri müharibənin region xalqlarına ciddi itkilər verdiyini və qarşıdurmanın davam etməsinin beynəlxalq ictimaiyyətin ümumi maraqlarına uyğun olmadığını vurğulayıb.
Pekinin açıqlaması ABŞ və İran arasında hərbi gərginliyin davam etdiyi, eyni zamanda region ölkələrinin diplomatik həll yolları axtardığı bir dövrə təsadüf edir.
