ABŞ Prezidenti Donald Tramp Dublində verdiyi açıqlamada İranla davam edən qarşıdurma fonunda NATO və Avropa ölkələrinin mövqeyini tənqid edib. O, müttəfiqlərin Hörmüz boğazı ilə bağlı ABŞ-yə lazımi dəstəyi göstərmədiyini bildirib.
ArabAZ xəbər verir ki, Tramp NATO və Avropa ölkələrinin davranışını “bir çox baxımdan çox məyusedici” adlandırıb.
“NATO Hörmüz boğazı məsələsində bizə kömək etmək istəmədi. Halbuki biz boğazdan neft almırıq”, – ABŞ Prezidenti deyib.
Tramp həmçinin İrandakı hərbi əməliyyatların ABŞ hərbi texnikasının üstünlüyünü nümayiş etdirdiyini iddia edib.
“Hamı Amerika hərbi texnikasının üstünlüyünü gördü”, – Tramp bildirib.
ABŞ Prezidenti Hörmüz boğazındakı minalarla bağlı da açıqlama verərək onların hamısının zərərsizləşdirildiyini iddia edib.
“Bütün minaları zərərsizləşdirdik. Orada artıq mina yoxdur”, – Tramp deyib.
