BAKI, AzerVoice
ABŞ Prezidenti Donald Trampın Braziliyaya qarşı rüsumlar tətbiq edəcəyi ilə bağlı hədələri, Braziliyanın BRİKS tərəfdaşları ilə münasibətlərini daha da gücləndirir.
AzerVoice xəbər verir ki, bu barədə Braziliya prezidentinin beynəlxalq məsələlər üzrə xüsusi köməkçisi Selsu Amorim “Financial Times” qəzetinə verdiyi müsahibədə bildirib.
Onun fikrincə, Trampın atdığı addımlar Braziliyanın BRİKS-lə əlaqələrini möhkəmləndirir, çünki Braziliya tərəfdaşlığını şaxələndirmək və tək bir dövlətdən asılı vəziyyətdə qalmamaq istəyir.
Amorim həmçinin vurğulayıb ki, Braziliya hakimiyyəti Avropa, Asiya və Cənubi Amerikadakı digər ölkələrlə də əməkdaşlığı genişləndirmək niyyətindədir.
Tramp haqqında danışan Amorim qeyd edib ki, “Ağ Ev rəhbərinin nə dostları, nə də maraqları var, yalnız istəkləri var”. O, ABŞ prezidentinin sabiq Braziliya prezidenti Jair Bolsonarunun məhkəmə prosesi ilə bağlı bəyanatlarını “ölkənin daxili işlərinə kolonial ruhda müdaxilə” kimi qiymətləndirib.
Xatırladaq ki, bundan əvvəl Tramp avqustun 1-dən etibarən Braziliya məhsullarına 50 faizlik rüsum tətbiq edəcəyini elan etmişdi. Braziliya prezidenti Luis İnasio Lula da Silva isə Trampın bu qərarını iyulun sonunadək yenidən nəzərdən keçirməyəcəyi təqdirdə, eyni şəkildə cavab veriləcəyini vəd edib.
