BAKI, AzerVoice
ABŞ Prezidentinin Yaxın Şərq üzrə xüsusi nümayəndəsi Stiven Uitkoffun bugün İsrailə səfər edəcəyi gözlənilir.
AzerVoice xəbər verir ki, bu barədə "Axios" portalı amerikalı rəsmilərə istinadən məlumat yayıb.
Məlumata görə, bu, Uitkoffun 6 aydan sonra İsrailə ilk səfəri olacaq.
Nəşrin mənbələrinin bildirdiyinə görə, Uitkoff həmçinin Qəzza zolağına səfər edə və Qəzzaya Humanitar Yardım Fondu (GHF) tərəfindən yaradılan yardım paylama məntəqələrini ziyarət edə bilər.
Mənbələrin məlumatına görə, ABŞ Prezidenti Donald Tramp Qəzzadakı humanitar vəziyyətlə daha yaxından tanış olmaq və mülki əhaliyə göstərilən yardımı artırmaq üçün daha düzgün qərar vermək niyyətindədir.
Qeyd edək ki, iyulun 27-də HƏMAS lideri Xəlil əl-Həyyə, Qəzzanın blokadası davam etdiyi müddətcə İsraillə danışıqların mənasız olduğunu bəyan edib. Bundan əvvəl İsrailin Baş naziri Benyamin Netanyahu Qətərin paytaxtı Dohada keçirilən danışıqlarda iştirak edən İsrail nümayəndə heyətinin geri çağırılması barədə göstəriş verib. Bu qərar HƏMAS-ın atəşkəslə bağlı təklifə verdiyi cavabdan sonra qəbul edilib.
Stiven Uitkoff isə "X" sosial şəbəkəsində də yazıb ki, Vaşinqton da öz nümayəndələrini Dohadan geri çağırıb. O bildirib ki, HƏMAS-ın son cavabı Qəzzada atəşkəsə razı olmadığını açıq şəkildə ortaya qoyur.
