BAKI, AzerVoice, Səməd Əyyubov
Yaxın bir neçə gün ərzində Qəzza ilə bağlı razılığa gəlməyin mümkün olub-olmadığı aydın olacaq, əks təqdirdə döyüşlər davam edəcək.
AzerVoice xəbər verir ki, bu barədə İsrail ordusunun Baş Qərargah rəisi Eyal Zamir bildirib.
“Hesab edirəm ki, qarşıdakı günlərdə girovların azad edilməsi ilə bağlı qismən razılığa gəlib-gəlməyəcəyimiz məlum olacaq. Əgər razılıq əldə olunmasa, döyüşlər fasiləsiz davam edəcək”- deyə, o qeyd edib.
“Qəzza zolağında nəzarət altında olan ərazilərin təmizlənməsi nəticəsində, cəmiyyətimizi effektiv şəkildə qorumağa və hərbi əməliyyatları fasiləsiz davam etdirməyə imkan verən bir təhlükəsizlik zonası formalaşdırmışıq. HƏMAS-ın qurduğu tələlərə düşməyəcəyik” - deyə, o əlavə edib.
O həmçinin bildirib ki, Qəzza zolağında insanların həlak olmasının məsuliyyəti HƏMAS-ın üzərindədir.
“Hazırda məqsədli şəkildə, İsrail Müdafiə Qüvvələrini müharibə cinayətlərində ittiham etmək məqsədilə yalan məlumatlara əsaslanan bir kampaniya aparılır. Qəzza zolağında insanların həlak olmasının və əzab çəkməsinin əsas məsuliyyəti HƏMAS-ın üzərindədir. İsrail əsgərləri və zabitləri isə ordunun dəyərlərinə və beynəlxalq hüquqa uyğun şəkildə dürüst və məsuliyyətli davranırlar” - deyə, o vurğulayıb.
Qeyd edək ki, iyulun 27-də HƏMAS lideri Xəlil əl-Həyyə, Qəzzanın blokadası davam etdiyi müddətcə İsraillə danışıqların mənasız olduğunu bəyan edib. Bundan əvvəl İsrailin Baş naziri Benyamin Netanyahu Qətərin paytaxtı Dohada keçirilən danışıqlarda iştirak edən İsrail nümayəndə heyətinin geri çağırılması barədə göstəriş verib. Bu qərar HƏMAS-ın atəşkəslə bağlı təklifə verdiyi cavabdan sonra qəbul edilib.
Stiven Uitkoff isə "X" sosial şəbəkəsində də yazıb ki, Vaşinqton da öz nümayəndələrini Dohadan geri çağırıb. O bildirib ki, HƏMAS-ın son cavabı Qəzzada atəşkəsə razı olmadığını açıq şəkildə ortaya qoyur.
