BAKI, Azervoice, Nərmin Ağayeva
İranda İŞİD üzvü olmaqda ittiham olunan Mehdi Əsgərzadə və Mossad-a casusluqda təqsirləndirilən Ruzbeh Vadi barəsində çıxarılan edam hökmləri icra edilib.
Azervoice xəbər verir ki, İran məhkəmə sistemindən İRNA agentliyinə verilən məlumata görə, hər iki şəxs barəsində Ali Məhkəmənin təsdiqlədiyi edam qərarı bu gün səhər saatlarında həyata keçirilib.
Məlumata əsasən, İŞİD üzvü olduğu iddia edilən Mehdi Əsgərzadə Suriya və İraqda hərbi və ideoloji təlim keçməkdə, Suriyada döyüş əməliyyatlarında iştirak etməkdə və İranda hücum planlaşdırmaqda ittiham olunub.
Mossad-a casusluqda ittiham edilən Ruzbeh Vadinin isə ölkənin mühüm dövlət qurumlarından birində çalışdığı, sosial media üzərindən əlaqə saxladığı İsrail kəşfiyyatı nümayəndələri ilə Avstriyanın paytaxtı Vyanada görüşdüyü bildirilib. O, həmçinin İsrailin hücumlarında öldürülən iranlı nüvə alimi haqqında məlumat ötürməkdə təqsirli bilinib.
Qeyd edək ki, İran məhkəmə orqanları son aylarda xarici kəşfiyyat şəbəkələrinə qarşı əməliyyatları intensivləşdirib və xüsusilə Mossad-la əlaqədə olan şəxslərə qarşı sərt tədbirlər görülür.
