BAKI, AzerVoice, Səməd Əyyubov – İsrailin Baş naziri Benyamin Netanyahu sabah yerli vaxtla saat 18:00-da Təhlükəsizlik Kabinetinin iclasını keçirəcək.
AzerVoice-un məlumatına görə, iclasda Qəzza zolağının tamamilə işğalı da daxil olmaqla bölgəyə qarşı hərbi hücum planları müzakirə olunacaq.
İsrail ordusunun Baş Qərargah rəisi Eyal Zamir və digər hərbi rəhbərlərin xəbərdarlıqlarına baxmayaraq, Təhlükəsizlik Kabinetinin Qəzzanın tam işğalı planına razılıq verəcəyi gözlənilir.
Digər tərəfdən, Birləşmiş Millətlər Təşkilatının (BMT) baş katibinin müavini Miroslav Yença isə bildirib ki, İsrailin Qəzzadakı hərbi əməliyyatlarını genişləndirməsi fəlakətli nəticələr doğura bilər.
BMT Təhlükəsizlik Şurasında (BMT TŞ) çıxış edən Yença, belə bir addımın son dərəcə narahatedici olduğunu, həm daha çox fələstinlinin, həm də HƏMAS-ın əlindəki israilli girovların həyatını təhlükəyə atacağını vurğulayıb.
Qeyd edək ki, Eyal Zamir ilə Benyamin Netanyahu arasında Qəzza zolağının tam işğalı planı və hərbi strategiyalar mövzusunda gərgin müzakirə baş verib. Netanyahu Zamirdən Qəzza zolağının işğalı ilə bağlı planları yenidən işləyərək Nazirlər Kabinetinə təqdim etməyi tələb edib. Zamir isə planların artıq təqdim olunduğunu və əlavə risklərin nəzərə alınmalı olduğunu bildirib. Baş Qərargah rəisi bütün Qəzzanın işğalının İsrail üçün böyük təhlükə yaradacağını, girovların həyatı və ordunun mövqeyi baxımından riskləri artıracağını vurğulayıb.
