BAKI, AzerVoice, Fərid Mikayılov
İranın dini lider Əli Xameneinin hərbi müşaviri Yəhya Rəhim Səfəvi bildirib ki, İsraillə yeni müharibə başlaya bilər və bunun ardınca bəlkə də başqa müharibə olmayacaq.
AzerVoice xəbər verir ki, Səfəvinin sözlərinə görə, hazırda tərəflər arasında yazılı atəşkəs razılaşması yoxdur.
“Biz indi atəşkəsdə deyilik, sadəcə müharibənin fasilə mərhələsindəyik. ABŞ və İsrail güc yolu ilə sülh yaratmağa çalışır, lakin İran həm bölgədə, həm də qlobal miqyasda güclü olmalıdır”- deyə o bildirib.
O qeyd edib ki, İran ordusu bütün mümkün ssenarilərə hazırlaşır.
“Ən pis ssenarilər əsasında planlar qururuq. Ən yaxşı müdafiə hücumdur, müharibəyə hazırlıq isə sülhün təminatıdır”- deyə Səfəvi vurğulayıb.
İslam İnqilabı Keşikçiləri Korpusunun (SEPAH) sədr müavini Əli Fədəvi isə bildirib ki, İsrail 12 günlük müharibədə yanlış hesablamalara yol verib.
“Onlar qələbəyə əmin idilər, lakin uğursuz oldular. ABŞ və İsrail bütün gücü ilə müharibəyə girdilər, amma nəticə əldə edə bilmədilər”- deyə Fədəvi bildirib.
İranın birinci vitse-prezidenti Məhəmməd Rza Aref də oxşar mövqe sərgiləyib. Onun sözlərinə görə, hazırda ölkə rəsmi atəşkəsdə deyil.
Aref əlavə edib ki, İran münaqişələrin diplomatik yollarla həllini üstün tutur, lakin qarşı tərəfin danışıqlara sadiqliyindən əmin deyil.
ABŞ prezidenti Donald Tramp və İsrailin baş naziri Benyamin Netanyahu isə İrana xəbərdarlıq edərək bildiriblər ki, Tehran uranın zənginləşdirilməsini bərpa edəcəyi halda yeni zərbələr endiriləcək.
