BAKI, AzerVoice, Nərmin Ağayeva
Alyaska sammitindən sonra Rusiya prezidenti Vladimir Putinin sülh planı Ukrayna üçün sərt şərtlər irəli sürür, ABŞ prezidenti Donald Tramp isə bu tələblərə müsbət yanaşaraq təklifləri Ukrayna lideri Vladimir Zelenskiyə təqdim edib.
AzerVoice xəbər verir ki, Alyaskadan sızan məlumatlara görə, Rusiya Donetsk və Luqanskdan ibarət Donbas bölgəsinə tam nəzarət etmək istəyir. Hazırda Luqanskin böyük hissəsini ələ keçirən Moskva Donetskin 6600 kvadrat kilometr ərazisinin də nəzarətinə iddia edir. Bunun əvəzində Rusiya Xarkov və Sumı vilayətlərində işğal etdiyi təxminən 450 kvadrat kilometrdən geri çəkilməyə hazır olduğunu bildirir. Həmçinin Xerson və Zaporojya vilayətlərindəki cəbhə xəttinin sərhəd kimi tanınmasını təklif edir.
Moskvanın digər tələbləri Ukraynanın NATO üzvlüyündən imtina etməsi, rus dilinin ikinci rəsmi dil elan olunması və Moskva Patriarxlığına bağlı kilsənin sərbəst fəaliyyətinə icazə verilməsidir. Rusiya, həmçinin, 2014-cü ildən işğal etdiyi Krım yarımadasını danışıqlardan kənar saxlayaraq, onun rəsmi şəkildə Rusiya ərazisi kimi tanınmasını tələb edir.
ABŞ prezidenti Tramp “mən bunu qəbul edərdim” sözləri ilə Putinin planına dəstək ifadə edib. Lakin Ukrayna prezidenti Vladimir Zelenski bu tələbləri qəbul etməyəcəyini bildirib:. “Ukraynanı sülh istəməyən tərəf kimi göstərməyə çalışırlar. Bizdən mümkün olmayan güzəştlər tələb edirlər. Mən Konstitusiyaya görə bir qarış torpağı belə verə bilmərəm. Sülh yalnız hazırda cəbhə xətti ilə müəyyən olunmuş ərazilərə əsaslana bilər” - deyə qeyd edib.
Qeyd edək ki, Rusiya ilə Ukrayna arasında müharibənin bitməsi üçün müxtəlif vasitəçilərin təşəbbüslərinə baxmayaraq, tərəflərin mövqeləri hələ də kəskin fərqlənir.
