BAKI, AzerVoice, Nərmin Ağayeva
ABŞ Prezidenti Donald Tramp, Beynəlxalq Cinayət Məhkəməsinin (BCM) həbs qərarı çıxardığı İsrailin baş naziri Benyamin Netanyahunu “müharibə qəhrəmanı” adlandırıb.
AzerVoice xəbər verir ki, Tramp radio aparıcısı Mark Levinlə müsahibəsində Netanyahunun Qəzzadakı hərbi əməliyyatlara görə məsuliyyət daşımasına baxmayaraq, onu müdafiə edib.
“O, yaxşı insandır, döyüşür. Birlikdə işlədiyim üçün müharibə qəhrəmanıdır. Mən də eləyəm, düşünürəm”.- deyə bildirib.
Tramp BCM-nin Netanyahuya qarşı həbs qərarına, yoxsa İsraildəki korrupsiya işinə istinad etdiyini dəqiqləşdirməyib.
O, həmçinin İranın nüvə obyektlərinə qarşı ABŞ hücumlarının “uğurlu” olduğunu da vurğulayıb.
Qeyd edək ki, BCM 2024-cü il 21 noyabr tarixində Netanyahu və keçmiş müdafiə naziri Yoav Gallant barəsində Qəzzada törədilən hərbi cinayətlər və insanlığa qarşı cinayətlərə görə həbs orderi çıxarıb. Netanyahu ölkəsində 2019-cu ildən bəri davam edən korrupsiya ittihamları ilə də mühakimə olunur. Tramp isə bu məhkəmələrin ləğvini tələb edib.
Xatırladaq ki, 2023-cü ilin oktyabrın 7-dən bəri İsrailin Qəzza zolağına hücumları nəticəsində ən azı 62 064 fələstinli ölüb, 156 573 nəfər yaralanıb.
