BAKI,AzerVoice, Fərid Mikayılov
Fransa Prezidenti Emmanuel Makronun Avropanın təhlükəsizliyi üçün Türkiyənin də masada olması barədə açıqlaması Yunanıstanda etirazla qarşılanıb.
AzerVoice xəbər verir ki, keçmiş Yunanıstan Prezidenti Prokopis Pavlopulos, Makronun sözlərinə sərt reaksiya verərək “veto” ilə hədələyib.
Makron, Ukrayna münaqişəsinin həlli üçün Rusiya Prezidenti Vladimir Putin, Ukrayna Prezidenti Volodimir Zelenski və ABŞ Prezidenti Donald Tramp arasında keçirilməsi planlaşdırılan üçtərəfli görüşdən sonra Avropa ölkələri və Türkiyənin iştirakı ilə əlavə görüşün keçirilməsini təklif edib.
Makronun bu sözləri isə Yunanıstan tərəfini qəzəbləndirib. Pavlopulos açıqlamasında Türkiyəni Kiprdə “işğalçı dövlət” adlandırıb və Ankaranın Avropadakı nüfuzunun artmasından narahatlığını ifadə edib.
O, Makronun Türkiyəni Avropa müdafiə sisteminə daxil etmə ideyasına qarşı çıxıb.
“Əgər Aİ ölkələri bu reallığı görməzdən gəlsə, Yunanıstan və Kipr veto hüququndan istifadə etməyə məcbur olacaq. Bu veto, Türkiyənin Avropa Müdafiəsinə hər hansı formada qoşulmasının qarşısını almaq üçün əsas şərt kimi qəbul edilməlidir”- deyə o bildirib.
Qeyd edək ki, Fransa Prezidenti Makron dəfələrlə Avropanın təhlükəsizlik mexanizmlərinin gücləndirilməsində Türkiyənin rolunu vurğulayıb. Lakin Kipr məsələsi səbəbilə Yunanıstan və Kipr, Ankaranın Avropa müdafiəsinə inteqrasiyasına qarşı çıxır.
