BAKI, AzerVoice, Nərmin Ağayeva
ABŞ-ın İsraildəki səfiri Mike Huckabee Avropa ölkələrinə Fələstini tanımamaq üçün təzyiq göstərdiklərini etiraf edib.
AzerVoice xəbər verir ki, İsrail dövlət televiziyası KAN-a müsahibəsində səfir Huckabee bildirib ki, Vaşinqton administrasiyası Avropanı Fələstin dövlətini tanımamaq üçün “fəal şəkildə” yönləndirir. O, Fələstinin tanınmasının Oslo razılaşmalarının pozulması anlamına gələcəyini qeyd edib.
Huckabee, Misir və Qətərin yeni atəşkəs təklifinə münasibət bildirərkən, İsrailin qərarlarına müdaxilənin yersiz olduğunu deyib. O, ABŞ prezidenti Donald Trampın “bütün məhbusların geri qaytarılması və HƏMAS-ın hakimiyyətdə qalmaması” barədə mövqeyini xatırladıb.
Səfir Qəzzada kütləvi aclıq xəbərlərini təsdiqləmədiyini, lakin insanların aclıq çəkdiyinə “əmin olduğunu söyləyib. O, həmçinin humanitar yardımın çatdırılmasında BMT mexanizmini və HƏMAS-ı günahlandırıb.
Qeyd edək ki, hazırda 193 BMT üzvündən 147-si Fələstini rəsmən tanıyıb. Fransa, Kanada, Böyük Britaniya və Avstraliyanın sentyabr ayında bu addımı atacağı gözlənilir. Avropa ölkələrinin bu istiqamətdə mövqelərini sərtləşdirməsi fonunda HƏMAS-ın danışıqları dayandırdığı bildirilir.
